Elbasynyń tóraǵalyǵymen «Samuryq-Qazyna» ulttyq ál-aýqat qoryn basqarý jónindegi keńestiń otyrysy ótti, dep habarlaidy "Ult aqparat" Elbasynyń resmi saityna silteme jasap.
Jiynda pandemiia kezinde otandyq óndirýshilerdi qoldaý sharalary jáne «Samuryq-Qazyna» qoryn investitsiialyq holdingke ainaldyrý máselesi qaraldy.
– Bizdiń búgingi jiynymyz kúrdeli kezeńde ótip otyr. Alpaýyt elder arasyndaǵy básekelestik pen teketires kúsheiip barady. Qazaqstan ekonomikasyna úlken kúsh túsýde. Sonymen birge bul jańa ekonomikalyq model qalyptastyrý úshin qajetti reformalar júrgizý múmkindigi, – dedi Elbasy.
Nursultan Nazarbaev Qordy qaita qurý máselesin talqylaý barysynda tiimsiz investitsiialardy qysqartyp, tabysy joǵary investitsiialarǵa aýystyrýdyń mańyzdylyǵyn atap ótti.
– Biz negizgi maqsattardy Qordyń 2028 jylǵa deiingi jańartylǵan damý strategiiasynda aiqyndadyq. Eń bastysy – taiaý merzimde «Samuryq-Qazyna» qorynyń jumysyn jańa formatqa kóshirip, jetekshi táýelsiz ál-aýqat qorlary siiaqty investholdinge ainaldyrý. Bizge Qordyń portfelindegi aktivterdi geografiiasy men salasyna qarai ártaraptandyrý kerek. Tiimsiz investitsiialardan arylyp, olardy barynsha tabys ákeletin investitsiiaǵa aýystyrý qajet. Bul dividendterdiń ósýi esebinen biýdjetke túsetin túsimderdi ulǵaitýǵa múmkindik beredi, – dedi «Samuryq-Qazyna» ulttyq ál-aýqat qoryn basqarý keńesiniń tóraǵasy.
Sonymen qatar Qazaqstannyń Tuńǵysh Prezidenti daǵdarys jaǵdaiynda Úkimet otandyq biznesti qorǵaý úshin teńdessiz sharalar qabyldaǵanyn atap ótti.
– Tótenshe jaǵdai kezeńinde halyq pen biznesti qoldaý, ekonomikalyq turaqtylyqty saqtaý úshin daǵdarysqa qarsy sharalardyń úsh birdei toptamasy qabyldandy. Biraq pandemiia báseńder emes. Onyń ekinshi kezeńi bastalyp keledi. Mundai kúrdeli jaǵdaida buǵan deiin atap ótkendei, otandyq kásipkerlerge qoldaý kórsetý qajet, – dedi Elbasy.
«Samuryq-Qazyna» aktsionerlik qoǵamynyń basqarma tóraǵasy A.Esimovtiń aqparatyn tyńdai kele, Nursultan Nazarbaev biznes belsendiliktiń kúrt tómendeýi jaǵdaiynda kvazimemlekettik sektordyń memlekettik tapsyrystary men satyp alýlary óndiristik kásiporyndarǵa jáne kásipkerlerge kómek kórsetýdiń tiimdi sharasyna ainalǵanyn atap ótti.
– 2018-2020 jyldar aralyǵynda Qordyń satyp alýynyń 93 paiyzy, iaǵni jalpy sommasy bir trillion teńgeden asatyn 4200 pozitsiia básekelestik ortaǵa berildi. 23 myńǵa jýyq kásipkerlik sýbektiler satyp alýǵa tikelei qol jetkizdi. Osy kezeńde bir kózden satyp alý 60 paiyzǵa azaiǵan. Nátijesinde 400 milliard teńgeden astam qarjy únemdeldi. Osy jumysty jalǵastyrý kerek, – dedi Qordy basqarý jónindegi keńestiń Tóraǵasy.
Keńes barysynda «QazMunaiGaz» ulttyq kompaniiasy» aktsionerlik qoǵamy, «Qazaqstan temir joly» ulttyq kompaniiasy» aktsionerlik qoǵamy, «Qazatomónerkásip» ulttyq atom kompaniiasy» aktsionerlik qoǵamy, «Qazaqtelekom» aktsionerlik qoǵamy, «Samuryq-Energo» aktsionerlik qoǵamy jáne «Eir Astana» aktsionerlik qoǵamy basshylarynyń esepteri tyńdaldy.
Sondai-aq, Qazaqstannyń Tuńǵysh Prezidenti kásiporyndardyń toqtap qalýyna jáne qysqartýlarǵa jol bermei, oń qarqyn saqtap qalýǵa múmkindik ashqan Qordyń jańa damý strategiiasynyń tiimdiligin atap ótti.
– Strategiialyq mańyzdy salalarda barlyq kásiporynnyń áleýmettik turaqtylyǵyn saqtaý, jumysshylarǵa qamqorlyq tanytý jáne turaqty qyzmetin qamtamasyz etý qajet. Óndiristik personaldy barynsha qorǵaýymyz kerek. Bul 300 myń adam jáne 340-tan astam kásiporyndy qamtidy. Importqa táýeldilikti azaitý úshin de biraz sharýa atqaryldy. Qordyń úlgisinde otandyq bizneske belsendi qoldaý kórsetýdi úirendik, – dedi Elbasy.
Nursultan Nazarbaev usynylǵan ózgerister táýelsiz qorlardy damytýdyń álemdik tájiribesine sáikes keletinin atap ótti.
Qazaqstannyń Tuńǵysh Prezidenti Qordyń damý strategiiasyn iske asyrý boiynsha «Samuryq-Qazyna» basshylyǵynyń qyzmetine oń baǵa berdi.
Otyrys qorytyndysy boiynsha Keńes músheleri Qordy investitsiialyq holdingke ainaldyrýdyń tujyrymdamasyn maquldady. Sondai-aq «Samuryq-Qazyna» aktsionerlik qoǵamy basqarmasyna pandemiia kezinde otandyq taýar óndirýshilerdi qoldaýǵa baǵyttalǵan is-sharalardy júzege asyrýdy jalǵastyrýdy tapsyrdy.
