Teńgeniń mereitoilyq banknotynda Elbasy Nursultan Nazarbaevtyń beinelenýin Qazaqstan azamattary qyzý qoldaýda. Biz Senat Tóraǵasynyń orynbasary Bektas BEKNAZAROVTYŃ oi-paiymyn jazyp alǵan edik.
– Bektas Ábdihanuly, áýeli ulttyq valiýtamyzdyń qoǵam ómirindegi róli týraly aityp berseńiz?
– Kez kelgen memlekettiń qalyptasýy men onyń damý tarihy sol memlekettiń mindetti rámizderiniń biri bolyp tabylatyn ulttyq valiýtasy tarihymen tyǵyz bailanysty ekeni belgili. Sondyqtan, biz elimizdiń 25 jyldyq táýelsizdik tarihy týraly sóz qozǵaǵanda, onyń ulttyq valiýtasyna da toqtalyp ótetinimiz zańdylyq.
Jýyrda ǵana biz elimizdiń ekonomikalyq táýelsizdiginiń simvoly – Ulttyq valiýtamyzdyń dúniege kelgen kúnin atap óttik. Naryqtyq júieni júzege asyra bastaǵan Qazaqstan úshin ótken ǵasyrdaǵy sol 1991-92 jyldar aqsha júiesiniń turaqsyzdyǵyn ábden bastan keshirgen qiyn jyldar boldy. Qazirgi jas býyn onyń bárin kitaptan oqyp bilse, bizder ony ózimiz bastan keshirdik.
1993 jyldyń qarasha aiynda óz teńgemizdiń ainalysqa shyǵarylýy bizdiń jas táýelsiz elimizdiń jylnamasyndaǵy eń mańyzdy oqiǵalardyń biri boldy. Men óz otbasym týraly aitsam, zaiybym bank qyzmetkeri bolatyn. Aqsha aýysady, endi biz óz teńgemizdi paidalanamyz dep júrgen sol kúnderi ol táýliktep jumysynan shyqpaityn. Tún ortasynda jumysynan kelgende, qunsyz qaǵazǵa ainalǵan «aǵash aqshanyń» esebin milliardtap sanaǵanyn aityp keletin. Al endi jap-jańa teńge banknottary qolymyzǵa tigende, ony qalai uqyptap ustaǵanymyz, óz aqshamyz úshin keýdemizdi qandai maqtanysh kernegeni de esimde.
– Tól teńgemizdi engizýdegi Elbasy N.Nazarbaevtyń eńbegi qandai? Mereitoilyq banknotqa Elbasy beinesiniń salynýyna qalai qaraisyz?
– Keńes ókimeti taraǵan soń kóp uzamai ulttyq valiýtamyzdyń ainalysqa engizilýi Elbasymyzdyń strategiialyq kóregendigi ekendigi daýsyz. Teńge týraly suraqty Elbasy táýelsizdiktiń alǵashqy qadamdarymen qatar kóterip, kóptegen uiymdastyrý máseleleri sol alǵashqy kezeńde qupiia júrgizilgenin biz keiin bildik. Teńgeni jasaýdaǵy Tuńǵysh Prezidentimizdiń eren eńbegin árqaisymyz, árine, jaqsy bilemiz.
Al endi búgin ózimiz kórip otyrǵandai, Memleket basshysy beinesiniń mereitoilyq banknotqa basylyp shyǵarylýy – búkil halqymyzdyń Elbasyna degen erekshe qurmetiniń kórinisi dep bilemin. 25 jyldyq tarihynda Nursultan Ábishuly Nazarbaevtyń basqarýymen bizdiń elimiz aldyna nebir joǵary dárejeli maqsat qoiǵan damyǵan memleketke ainaldy. Birlik pen kelisimniń arqasynda elimiz saiasi turaqtylyqtyń tuǵyrynda, joǵary ekonomikalyq jáne áleýmettik órleýge jetti.
Osynyń bári ońai boldy dep eshkim aita almaidy. Táýelsizdigimizdi endi jariialaǵan jyldardaǵy eldiń basynan ótken tar jol – taiǵaq keshýler búkil Qazaqstan halqyna aýyr syn bolǵany aian. Osy bir kúrdeli kezeńde barlyǵymyz el Prezidentine sendik, onyń eldi barlyq qiyndyqtardan aman alyp shyǵa alatynyna kúmánimiz bolǵan joq. «Memleketti qutqarý úshin bir uly adamynyń bolǵany jetkilikti» degen oishyl Volterdiń sózi bar. Osy aitylǵan «uly adam» – bizdiń Elbasymyz Nursultan Nazarbaev boldy.
Ekonomikasy men qarjylyq jaǵdaiy eń myqty degen elderdiń ózi qazir ártúrli saladaǵy daǵdarystardy bastan keship jatyr. Ókinishke qarai, mundai jaǵdai Qazaqstandy da ainalyp ótken joq. Biraq bizde bul jaǵdaidan alyp óter «Ult jospary» bar, baǵytymyz anyq jáne aiqyn. Zamanynda ǵulama Konfýtsii «Alysyn boljai almaǵan adamdy jaqyn qaterler kútip turady» degen eken. Elbasymyz bizdiń aldymyzǵa «Máńgilik El» bolý maqsatyn qoidy, qazir búkil qazaqstandyqty osy maqsatqa qyzmet etýdi úilestirip jatyr. Alysyn boljai bilý degen – osy! Endeshe, osy maqsatqa jeter eńbegimiz jemisti bolsyn.
– Aitqanyńyz kelsin!
Áńgimelesken
Jaqsybai SAMRAT,
«Egemen Qazaqstan»
.jpeg)