QR Prezidenti Nursultan Nazarbaev Dúniejúzi qazaqtarynyń quryltaiy barysynda QR Syrtqy ister ministrligine jáne Úkimetke shetelden Atajurtqa oralýǵa niettengen qazaqtarǵa qujat jinatyp, shekarada shyrǵalań týǵyzbaýdy tapsyrdy, dep habarlaidy QazAqparat.
«Elim, jerim dep eńiregen árbir qazaqqa Qazaqstannyń esigi árqashan ashyq, aiqara ashyq. Eshkimge shekteý joq. Jaǵdai bar, elime kelemin degenderge qaýymdastyq arqyly barlyq jaǵdaidy jasaýymyz kerek. Biz kóship kelýge niet etken aǵaiynǵa jol silteýdi turǵylyqty jerinen bastaýymyz kerek. Bizdiń barlyq elderde Elshilikterimiz bar. Sol Elshilikter azamattardyń qujattaryn qamdap, qonystanatyn jeri týraly keńes berýi tiis. Osynda otyrǵan Syrtqy ister ministrine tapsyramyn. Kelemin degender shekarada ylǵi shyrǵalań bolyp turady. Elge kelgennen soń, qujat túgendeý úshin ary-beri sarylý bolmaýy kerek. Qytai qazaqtarynyń sottalǵany nemese sottalmaǵany týraly anyqtama alý jaiy aǵaiynǵa problemalar týǵyzady. Ony shekara turǵysynan sol jerde anyqtap, elmenen aqyldasyp, kelisip, sheshý kerek. Úkimetke osynyń barlyǵyn keshendi túrde qaita qarap, sheshimin tabýdy tapsyramyn», - dedi Prezident Quryltaidyń ashylý saltanatynda.
Aita keteiik, Astana qalasynda Dúniejúzi qazaqtarynyń V quryltaiy óz jumysyn bastaǵan bolatyn. Quryltai jumysyna barlyǵy 800 delegat pen qonaq qatysýda, onyń 350 adamy alys jáne jaqyn sheteldegi 39 memleketten keldi. Bul - ǵylymi-shyǵarmashylyq jáne pedagogikalyq ziialylar ókilderi, biznes, sport, buqaralyq aqparat quraldary salalarynyń mamandary, memlekettik jáne qoǵamdyq uiymdardyń qyzmetkerleri. Quryltai delegattary men qonaqtarynyń 80 paiyzy mundai is-sharaǵa alǵash ret qatysýda.
Dúniejúzi qazaqtary quryltaiynyń baspasóz ortalyǵynda 150 otandyq jáne sheteldik BAQ ókilderi aqparat taratady.
1992 jyldan beri ótkizilip kele jatqan Quryltai dúniejúziniń túkpir-túkpirinde turatyn etnikalyq qazaqtardyń kezdesý orny ári biregei suhbat alańy bolyp tabylady.
.jpeg)