QR Tuńǵysh Prezidenti - Elbasy Nursultan Nazarbaev «Egemen Qazaqstan» gazetiniń 100 jyldyq mereitoiyna orai quttyqtaý joldady. Elimizdiń bas basylymnyń mereitoiyna orai ótip jatqan saltanatty sharada Elbasy quttyqtaýyn QR Memlekettik hatshysy Qyrymbek Kósherbaev oqyp berdi, dep habarlaidy QazAqparat.
«Elimizdiń jetekshi basylymy, qazaq baspasóziniń qara shańyraǵy - «Egemen Qazaqstan» gazetiniń 100 jyldyq mereitoiy qutty bolsyn! Bir ǵasyr buryn »Ushqyn« degen atpen shyǵa bastap, ýaqyt óte ulttyq basylymǵa ainalǵan Táýelsiz Qazaqstannyń aǵa gazeti óz paraqtarynda tarih taǵylymyn dáýir únimen, ýaqyt synymen beinelep, keshegi men búginniń arasyn jalǵap keledi. Jańalyqty jurtshylyqqa jedel ári shynaiy túrde jetkizip, egemen elimizdiń memlekettik saiasatyn qalyń oqyrman arasynda baiypty nasihattap, el shejiresin qaǵazǵa hattaǵan baiyrǵy basylymnyń bedeli ár daiym biik», - dep atap ótedi QR Tuńǵysh Prezidenti.
Elbasy quttyqtaý hatynda ult múddesi jolynda eńbek etken talai tuǵyrly tulǵalar basshylyq jasap, alyptar negizin salǵan dástúrdi abyroimen jalǵastyrǵan «Egemen Qazaqstan» qazirgi zaman talabyna sai jańǵyryp, ǵasyrlyq týyn jańa jetistiktermen, tolaiym tabystarmen qarsy alyp otyrǵandyǵyna basa nazar aýdarady.
«Jetekshi baspasóz quralynda eńbek etip júrgen qalam ieleri joǵary kásibi deńgeiimen tabylyp, basylym aldaǵy ýaqytta da halqymyzdyń murat-maqsaty men qoǵam damýyna laiyqty úlesin qosa beredi dep senemin», - degen Nursultan Nazarbaev basylym ujymyna zor densaýlyq, shyǵarmashylyq tabystar tiledi.
.jpeg)