- Búgin Ekspo kórmesiniń aýmaǵynda Təýelsizdiktiń 25 jyldyǵyna orai jańa monýmenttiń ashylý saltanatynda Memleket basshysy Nursultan Nazarbaev Astana qalasynyń əkimi Əset Isekeshevtiń qazaqsha baiandamasyn túsine almai, əkimge resmi tilde quttyqtaý aitýǵa ruqsat berdi, dep habarlaidy Ult.kz tilshisi QazAqparat agenttigine silteme jasap.
Memleket basshysy Nursultan Nazarbaev monýmenttiń ashylýyna jinalǵan halyqty Təýelsizdik kúnimen quttyqtap, Qazaqstan men Astanadaǵy səýletti monýmentterdiń jylnamasyna toqtalyp ótti. Al, Təýelsizdiktiń 25 jyldyǵyn ańǵartatyn jəne 2017 jyldaǵy basty alań - Ekspo kórmesiniń mańynda ornalasqan biik monýmenttiń mańyzdylyǵyna toqtalǵan Elbasy ortaǵa monýment avtorlaryn shaqyrdy.
Biraq, monýment avtorlary ortadan tabylmaǵan soń, Memleket basshysy Astana qalasynyń əkimi Əset Isekeshevti janyna shaqyrdy.
"Negizi, búgin sen (Əset Isekeshev) búkil jaidy baiandaý kerek ediń, biraq, aiazda men baiandama jasadym", - dep qaljyńdaǵan Memleket basshysy Əset Isekeshevpen birge ortaǵa shyqqan qurylys kompaniiasynyń ókilin tyńdady.
Monýmentti salǵan qurylys kompaniiasy esep bergen soń, elorda əkimi Əset Isekeshev halyqty quttyqtaý úshin daiyndap kelgen baiandamasyn oqi bastady.
"Asa mərtebeli Elbasy! Qadirli saltanatqa jinalǵan qaýym! Elimizdiń eń ulyq ta qasietti merekesi - Təýelsizdiktiń 25 jyldyq mereitoiy qutty bolsyn. Osy shirek ǵasyr ishinde arman-muraty aiqyn, jasampaz elge ainaldyq", - dep baiandamasyn bastaǵan Əset Isekeshevti Elbasy toqtatyp, "túsiniksiz, oryssha jalǵastyra ber", - dedi. Astana əkimi quttyqtaýyn resmi tilde jalǵastyrdy.
Aita keteiik, búgin Memleket basshysy Nursultan Nazarbaev Astanada Təýelsizdiktiń 25 jyldyǵyna arnalǵan monýmenttiń ashylýyna qatysty.
.jpeg)