«El Daýysy» qoǵamdyq qory Qazaqstan Respýblikasynyń Quryltaiy depýtattaryn sailaý barysyna qoǵamdyq baqylaýdyń belsendi kezeńine kiriskenin málimdedi, dep habarlaidy Ult.kz.
Sailaýaldy úgit-nasihat kezeńi resmi túrde bastalǵannan keiin qor ókilderi el aýmaǵynda sailaý zańnamasy talaptarynyń saqtalýyna baqylaý júrgizýdi bastady.
Qor jetekshisi Aida Djeksenovanyń aitýynsha, baqylaýshylardy daiyndaý boiynsha negizgi jumys aldyn ala júrgizilgen. Búgin Qazaqstannyń 22 qalasynda qoǵamdyq baqylaýdyń mobildi kapitandarynyń jelisi qurylǵan. Jelige aldyńǵy elektoraldyq naýqandarǵa qatysqan, tájiribeli kapitandar men úilestirýshiler kirgen.
Jeli quramynda 67-den asa mobildi kapitan bar. Olar 3-5 adamnan quralǵan mobildi toptarda jumys istep, aýysym-aýysymmen sailaýaldy úgit-nasihat júrgiziletin qoǵamdyq oryndardy aralaidy. Olar sailaý zańnamasy talaptarynyń saqtalýyn baqylaidy, qoǵamdyq mańyzy bar faktilerdi tirkeidi jáne aqparatty qordyń biryńǵai úilestirý shtabyna jedel túrde jetkizip otyrady. Qajet bolǵan jaǵdaida mobildi toptardyń quramy kúsheitilip, óńirler arasynda qaita bólinedi.
«Sailaýaldy úgit-nasihat kezeńi jariialanǵannan keiin biz úshin qoǵamdyq baqylaýdyń belsendi satysy bastalady. Komandalardy aldyn ala daiyndadyq. Búgin elimizdiń 22 qalasynda mobildi kapitandar jumysyn bastady. Olardyń mindeti – sailaýaldy úgit-nasihat barysyn baqylaý, bolyp jatqan jaǵdailardy obektivti túrde tirkeý jáne sailaý protsesiniń barlyq kezeńinde qoǵamdyq baqylaýdy qamtamasyz etý», — dedi «El Daýysy» qoǵamdyq qorynyń jetekshisi Aida Djeksenova.
Onyń aitýynsha, keiingi jyldary qor komandasy Prezident jáne Parlament sailaýlaryn, respýblikalyq referendýmdy, aýyl ákimderin sailaýdy jáne ózge de elektoraldyq naýqandardy baqylaýǵa qatysyp keledi.
Qor usynǵan aqparat boiynsha mobildi toptar uiym jumys isteitin barlyq qalada óz mindetin bastap ketti. Toptardyń qyzmetin úilestirý «El Daýysy» qoǵamdyq qorynyń ortalyq shtabynyń turaqty ózara is-qimyly arqyly júzege asyrylady. Shtab aqparat almasý, óńirlik komandalarmen jedel bailanys jáne baqylaýshylar jumysyna qoldaý kórsetýdi qamtamasyz etedi.
«Óńirlik komandalarymyz jumysqa kirisip ketti. Olar búkil sailaý naýqany kezeńi boiy qoǵamdyq baqylaýdy júrgizedi. Bul jumys óńirlerden aqparatty ýaqtyly alýǵa múmkindik beredi jáne sailaý protsesiniń ashyqtyǵy men jariialylyǵyn qamtamasyz etýge yqpal etedi dep senemiz», – dep atap ótti Aida Djeksenova.
«El Daýysy» qoǵamdyq qorynyń ókilderi qoǵamdyq baqylaý sailaý naýqanynyń barlyq kezeńderi boiy júzege asyrylatynyn atap ótti. Sonymen qatar qor barlyq qajetti daiyndyq rásimderi aiaqtalǵannan keiin daýys berý kúni tikelei jumysqa tartylatyn táýelsiz baqylaýshylar jelisin úilestirip jatyr.
