EKSPO kórmesine keletin týrister qymbat qonaqúi nómirlerin brondap jatyr.
Bul rette, elordada qolaily baǵada páterler men hostel nómirlerin alýǵa burynǵysha múmkindik mol, dep habarlady Astana ákimdiginiń media ortalyǵynan.
«Astana Konvensh Biýro» JShS direktorynyń orynbasary Asqar Adambekovtyń aitýynsha, meimandar tarapynan «bes» nemese «tórt juldyzdy» qonaqúilerge suranys joǵary, al arzanyraq baǵadaǵy qonaqúi, hostel, jataqhanalarda oryn kóp.
«Kórmeniń alǵashqy kúnderi qonaqúi jelileri 100% toldy. Bes nemese tórt juldyzdy qonaqúilerde tipti bos oryn qalmady. Al basqa nómirlerde, aitalyq, úsh juldyzdy qonaqúilerde oryn jetkilikti» - dedi A. Adambekov.
Elorda ákimdigi qazaqstandyq turǵyn úi segmentinde (qonaqúiler) baǵalar sheteldikter úshin ǵana emes, eldiń ár óńirinen keletin qonaqtarǵa da qoljetimdi dep sanaidy. Baǵanyń tez qubylýyna jol bermeý maqsatynda qala biligi jalǵa berýshilerdiń arnaiy qaýymdastyǵyn qurdy.
«Biz http://Torlet.com platforma-saityn qurdyq. Bul vebsait arqyly onlain turǵyda turatyn oryndy tańdap, brondaýǵa bolady», - dedi Astana qalasy ákiminiń orynbasary Malika Bekturova media ortalyqtyń tilshisine.
Resmi málimetterge súiensek, EKSPO-nyń alǵashqy kúnderi elordaǵa 10 myńnan astam qonaq kelgen. Álemdik juldyzdardyń kontserti ótetin kúnderi men iri sharalar kezinde týrister jan-jaqtan aǵylady dep kútilýde.
