EKSPO-2017 kórme kesheninde Amerika Qurama Shtattarynyń pavilony ashyldy, dep habarlaidy Ult.kz tilshisi QazAqparat agenttigine silteme jasap.
«Men bul saltanatty sharaǵa qatysyp otyrǵanyma qýanyshtymyn. Amerika Qurama Shtattarynyń bizdiń kórmemizge qatysýy - biz úshin óte mańyzdy. Óitkeni dúniejúzindegi jetekshi eldiń jańǵyrtylǵan energetika salasynda jetken jetistikteri kóp. AQSh-tyń EKSPO-2017 kórmesine qatysýy qanshalyqty mańyzdy ekendigin bárimiz jaqsy túsinemiz dep oilaimyn. AQSh pavilonynyń ashylýyna úles qosqandarǵa, demeýshilerge, munda usynylǵan jáne biz tyǵyz bailanys ornatqan kompaniialardyń barlyǵyna alǵysymdy bildirgim keledi», - dedi «Astana EKSPO-2017» UQ» AQ basqarma tóraǵasy Ahmetjan Esimov.
«Astana EKSPO» basshysy 25 jyl ishinde Qazaqstan men AQSh arasyndaǵy bailanys jaqsy damyp, kóptegen amerikalyq kompaniialardyń Qazaqstanda jumys istep jatqanyn atap ótti.
A.Esimov Qazaqstandaǵy AQSh-tyń Tótenshe jáne Ókiletti elshisi, pavilon komissary Djordj Krolǵa erekshe alǵys bildirdi. Onyń aitýynsha, AQSh-tyń kórmege qatysý máselesi ońailyqpen qabyldanbaǵan, alaida eki jaqty kúsh biriktirý nátijesinde másele oń sheshimin tapty. A.Esimov sondai-aq, EKSPO-2017 kórmesine kelýshilerdiń AQSh pavilonyndaǵy ekspozitsiiasymen tanysý óte qyzyqty bolatyndyǵyna sendirdi.
«Qazaqstan men AQSh-taǵy bizdiń áriptesterimizdi quttyqtaimyn, olardyń árqaisysy bizdiń pavilonnyń ashylýyna eleýli úles qosty. Birlesken is-qimyl AQSh pen Qazaqstannyń diplomatiialyq qatynastarynyń energiiasyn kórsetedi», - dep atap ótti pavilon komissary, Qazaqstandaǵy AQSh-tyń Tótenshe jáne Ókiletti Elshisi Djordj Krol.
AQSh pavilonynyń prezidenti Djoshýa Ýolker Amerikanyń sheksiz energiiasynyń qainar kózi adamdar ekendigin atap ótti.
Aita keteiik, AQSh ekspozitsiiasy 1 100 sharshy metr aýmaqty alyp jatyr jáne ol úsh bólikten turady: 1-zal «Energiia keńistigi» dep atalady, 2-zal «Ómir energiiasy» jáne post-shoý aimaǵy.
AQSh pavilonynyń taǵy bir ereksheligi - qonaqtardy qazaq nemese orys tilderin meńgergen qyryq amerikalyq stýdent qarsy alady.
