Qarjy ministrligine qarasty qarjy monitoringi komiteti 3 qarashada burynǵy densaýlyq saqtaý ministri Eljan Birtanovtyń sot sanktsiiasymen qamaýǵa alynǵanyn málimdedi.
"Qarjy ministrligine qarasty qarjy monitoringi komitetiniń ekonomikalyq tergeý qyzmeti burynǵy densaýlyq saqtaý ministri E.A.Birtanovqa qatysty iri kólemde qarjy jymqyrý faktisi boiynsha qozǵalǵan qylmystyq isti tergep jatyr. Sot E.A.Birtanovqa qatysty qamaý túrindegi bultartpas jazasyn qoldaný sharasyna ruqsat berdi. Tergeý qupiialylyǵyna bailanysty ózge aqparat aitylmaidy" delingen habarlamada.
31 qazanda jergilikti BAQ burynǵy densaýlyq saqtaý ministri Eljan Birtanovtyń "aqsha jymqyrý" faktisi boiynsha ustalǵanyn habarlaǵan edi. QazTAG agenttigi eks-ministrdiń tsifrlandyrýǵa bólingen 526 million teńge qarjyny talan-tarajǵa saldy degen aiyppen kúddikke ilingenin málimdegen.
49 jastaǵy Birtanov maýsym aiynyń sońynda, elde koronavirýs indeti ýshyǵyp turǵan sátte otstavkaǵa ketti. Onyń aldynda onyń koronavirýs aýrýyna shaldyqqany habarlanǵan bolatyn. Eks-ministr otstavkaǵa ketýin aýrýdan tolyq emdelý qajettigimen túsindirdi. Al Qazaqstan prezidenti Qasym-Jomart Toqaev 8 shildedegi málimdemesinde densaýlyq saqtaý ministrliginiń burynǵy basshylyǵyn qatań synǵa alǵan.
Prezident koronavirýs pen aýrý belgileri boiynsha soǵan uqsaityn pnevmoniia aýrýynyń órshýin Birtanov basqarǵan mekemeniń júieli qateliginen boldy dep, sol qatelikterdi tekserý boiynsha arnaiy komissiia qurýdy tapsyrdy.
Izinshe densaýlyq saqtaý vitse-ministri Oljas Ábishev "qarajatty ysyrap etý" baby boiynsha kúdikke ilinip, ustaldy. Aqparat boiynsha, tergeý organdary sheneýnikti "aqparattyq júie qurýǵa bólingen 500 million teńgeden astam qarajatty ysyrap qaldy" dep aiyptap otyr.
Jaqynda Batys Qazaqstan oblysy densaýlyq saqtaý basqarmasynyń jetekshisi Bolatbek Qaiypovtyń da "paraqorlyq" babymen ustalyp, 2 aiǵa qamalǵany belgili boldy.
Eljan Birtanov densaýlyq saqtaý ministrligin shamamen 3 jylǵa jýyq ýaqyt basqarǵan. Onyń aldynda eki jyl osy mekemede vitse-ministr bolyp jumys istedi. Birtanov densaýlyq saqtaý vitse-ministri qyzmetin 2008-2010 jyldary da atqarǵan. Odan keiin kvazi-memlekettik sektorda jetekshilik qyzmette bolǵan.
