قارجى مينيسترلٸگٸنە قاراستى قارجى مونيتورينگٸ كوميتەتٸ 3 قاراشادا بۇرىنعى دەنساۋلىق ساقتاۋ مينيسترٸ ەلجان بٸرتانوۆتىڭ سوت سانكتسيياسىمەن قاماۋعا الىنعانىن مەلٸمدەدٸ.
"قارجى مينيسترلٸگٸنە قاراستى قارجى مونيتورينگٸ كوميتەتٸنٸڭ ەكونوميكالىق تەرگەۋ قىزمەتٸ بۇرىنعى دەنساۋلىق ساقتاۋ مينيسترٸ ە.ا.بٸرتانوۆقا قاتىستى ٸرٸ كٶلەمدە قارجى جىمقىرۋ فاكتٸسٸ بويىنشا قوزعالعان قىلمىستىق ٸستٸ تەرگەپ جاتىر. سوت ە.ا.بٸرتانوۆقا قاتىستى قاماۋ تٷرٸندەگٸ بۇلتارتپاس جازاسىن قولدانۋ شاراسىنا رۇقسات بەردٸ. تەرگەۋ قۇپييالىلىعىنا بايلانىستى ٶزگە اقپارات ايتىلمايدى" دەلٸنگەن حابارلامادا.
31 قازاندا جەرگٸلٸكتٸ باق بۇرىنعى دەنساۋلىق ساقتاۋ مينيسترٸ ەلجان بٸرتانوۆتىڭ "اقشا جىمقىرۋ" فاكتٸسٸ بويىنشا ۇستالعانىن حابارلاعان ەدٸ. قازتاگ اگەنتتٸگٸ ەكس-مينيستردٸڭ تسيفرلاندىرۋعا بٶلٸنگەن 526 ميلليون تەڭگە قارجىنى تالان-تاراجعا سالدى دەگەن ايىپپەن كٷددٸككە ٸلٸنگەنٸن مەلٸمدەگەن.
49 جاستاعى بٸرتانوۆ ماۋسىم ايىنىڭ سوڭىندا, ەلدە كوروناۆيرۋس ٸندەتٸ ۋشىعىپ تۇرعان سەتتە وتستاۆكاعا كەتتٸ. ونىڭ الدىندا ونىڭ كوروناۆيرۋس اۋرۋىنا شالدىققانى حابارلانعان بولاتىن. ەكس-مينيستر وتستاۆكاعا كەتۋٸن اۋرۋدان تولىق ەمدەلۋ قاجەتتٸگٸمەن تٷسٸندٸردٸ. ال قازاقستان پرەزيدەنتٸ قاسىم-جومارت توقاەۆ 8 شٸلدەدەگٸ مەلٸمدەمەسٸندە دەنساۋلىق ساقتاۋ مينيسترلٸگٸنٸڭ بۇرىنعى باسشىلىعىن قاتاڭ سىنعا العان.
پرەزيدەنت كوروناۆيرۋس پەن اۋرۋ بەلگٸلەرٸ بويىنشا سوعان ۇقسايتىن پنەۆمونييا اۋرۋىنىڭ ٶرشۋٸن بٸرتانوۆ باسقارعان مەكەمەنٸڭ جٷيەلٸ قاتەلٸگٸنەن بولدى دەپ, سول قاتەلٸكتەردٸ تەكسەرۋ بويىنشا ارنايى كوميسسييا قۇرۋدى تاپسىردى.
ٸزٸنشە دەنساۋلىق ساقتاۋ ۆيتسە-مينيسترٸ ولجاس ەبٸشەۆ "قاراجاتتى ىسىراپ ەتۋ" بابى بويىنشا كٷدٸككە ٸلٸنٸپ, ۇستالدى. اقپارات بويىنشا, تەرگەۋ ورگاندارى شەنەۋنٸكتٸ "اقپاراتتىق جٷيە قۇرۋعا بٶلٸنگەن 500 ميلليون تەڭگەدەن استام قاراجاتتى ىسىراپ قالدى" دەپ ايىپتاپ وتىر.
جاقىندا باتىس قازاقستان وبلىسى دەنساۋلىق ساقتاۋ باسقارماسىنىڭ جەتەكشٸسٸ بولاتبەك قايىپوۆتىڭ دا "پاراقورلىق" بابىمەن ۇستالىپ, 2 ايعا قامالعانى بەلگٸلٸ بولدى.
ەلجان بٸرتانوۆ دەنساۋلىق ساقتاۋ مينيسترلٸگٸن شامامەن 3 جىلعا جۋىق ۋاقىت باسقارعان. ونىڭ الدىندا ەكٸ جىل وسى مەكەمەدە ۆيتسە-مينيستر بولىپ جۇمىس ٸستەدٸ. بٸرتانوۆ دەنساۋلىق ساقتاۋ ۆيتسە-مينيسترٸ قىزمەتٸن 2008-2010 جىلدارى دا اتقارعان. ودان كەيٸن كۆازي-مەملەكەتتٸك سەكتوردا جەتەكشٸلٸك قىزمەتتە بولعان.
