Qazaqstandyq tanymal ánshi Dimash Qudaibergen Polshada ótken kontsertinen keiin jankúierlerine erekshe yqylasyn bildirdi. Álemdik týrnesin Krakov qalasynan bastaǵan óner iesi tyńdarmandaryna alǵys aityp, aldaǵy kezdesýdi asyǵa kútetinin jetkizdi, dep habarlaidy ult.kz.
18 qazanda Polshanyń Krakov qalasyndaǵy Tauron Arena sahnasynda Dimash Qudaibergenniń DIMENSIONS atty jańa álemdik týrnesiniń alǵashqy kontserti ótti. Ánshiniń ónerin tamashalaýǵa álemniń túkpir-túkpirinen myńdaǵan jankúier jinaldy.
Aýqymdy shoýdan keiin Dimash áleýmettik jelidegi paraqshasynda kontsertten alǵan áserimen bólisip, poliak tyńdarmandaryna jyly lebizin arnady.
"Raqmet saǵan, Krakov! Raqmet, Polsha! DIMENSIONS atty álemdik týrnemiz sizderdiń arqalaryńyzda keremet bastaldy! Qoldaýlaryńyzǵa, erekshe yqylastaryńyzǵa jáne sol keshte syilaǵan umytylmas áserlerińizge alǵys aitamyn! Diýsseldorfta kezdeskenshe, qymbatty jankúierlerim!" – dep jazdy ánshi.
Óner iesiniń jazbasyna álemniń ár elinen jankúierler pikir qaldyryp, kontsertten alǵan áserlerin bólisti.
"Dimash, sahnada syilaǵan ǵajaiyp sátteriń úshin raqmet! Kontserttiń ár sekýndy júregimizde saqtalyp qaldy. Bári erekshe, ádemi ári áserli ótti", "Sizdi Polshada qarsy alý biz úshin úlken mártebn", "Jańa ánderińiz tańǵaldyrdy! Mahabbat pen qýanyshqa toly keshtiń áseri ekrannyń ar jaǵynan da sezildi", "Quttyqtaimyz, Dimash! Bul umytylmas kontsert boldy!" – dep jazdy tyńdarmandar.
Kontsertten keiin ánshi men onyń komandasy Krakov kóshelerin aralap, qalanyń kórikti jerlerin tamashalaǵan.
Osylaisha, Dimash Qudaibergenniń jańa álemdik týrnesi Polshada jankúierlerdiń ystyq yqylasymen bastaldy. Endi óner iesi DIMENSIONS shoýyn Germaniianyń Diýsseldorf qalasynda usynbaq.
Dimash Qudaibergen kim?
Dimash Qudaibergen – qazaq mýzykasyn halyqaralyq sahnada tanytyp júrgen ánshi, kompozitor ári mýltiaspapshy. Onyń tolyq esimi – Dinmuhammed Qanatuly Qudaibergen. Ánshi 1994 jyly 24 mamyrda Aqtóbe qalasynda dúniege kelgen. Ol bala kezinen fortepianoda oinap, mýzykalyq bilimin jetildirgen. Dimash Qudaibergen Aqtóbedegi Ahmet Jubanov atyndaǵy mýzykalyq kolledjde bilim alǵan. Keiin Qazaq ulttyq óner ýniversitetinde estradalyq vokal mamandyǵyn meńgergen.
2015 jyly Belarýstegi "Slavian bazary" halyqaralyq baiqaýynda bas júldeni jeńip alǵan.
2017 jyly Qytaidyń Singer mýzykalyq jobasynda ekinshi oryn ielenip, halyqaralyq tanymaldyqqa qol jetkizdi
2023 jyly oǵan "Qazaqstannyń halyq ártisi" qurmetti ataǵy berildi.
Al 2024 jyly Dimash Halyqaralyq kóshi-qon uiymynyń izgi niet elshisi bolyp taǵaiyndalyp, migranttardyń quqyqtaryn qorǵaýǵa baǵyttalǵan bastamalardy qoldaýǵa kiristi.
