Kásipker Erjan Sqaqov NUR.KZ portalyna bergen ekskliýzivti suhbatynda zorlaýǵa qatysty oqiǵanyń qalai bolǵanyn aityp berdi. Osyǵan deiin eks-depýtat ári biznesmen Sqaqov suhbat berýden bas tartqan edi.
"Osyǵan deiin úndemei kelgenim, shyn máninde, kinámdi moiyndaǵanym emes. Birinshiden qupiia tergeý júrgizildi. Al, ekinshiden, osy áńgimeni bastaǵandardyń dárejesine túskim kelmedi. Qazir barlyq tergeý jumystary aiaqtaldy. Aqsha bopsalaǵan blogerdiń soty da bitti. Biraq áli bitpegen bir is bar. Búgin osy isti uiymdastyrǵandardyń barlyǵynyń ústinen prokýratýraǵa shaǵym jazdym. Onyń ishinde qainym Orazbek Qatpanov pen sybailasy Elena Ivanova da bar.
Olar men jasamaǵan qylmysqa qatysty halyq aldynda kiná taqqany úshin, ótirik kýágerlik etkeni úshin jazalansa deimin.
Meni Dina Tańsáriniń jasap otyrǵan áreketi odan saiyn tańǵaldyrdy. Bota Qatpanovty qazaqtyń batyry dep ataǵan. Ol óz jaqyndaryn satyp ketken qainym ǵoi meniń. Elena 16 jasynan bastap onymen birge turyp keledi. Sóitip jap-jas qyzdy áieli turyp jatqan úige alyp keldi. Shýdyń barlyǵy osydan shyqqan. Munyń bárine dálel bar", - deidi ol.
Sqaqovtyń aitýynsha, ol qainysyn jumysynan shyǵyp jibergen soń álgi azamat eks-depýtatqa tisin qairap qalypty. Osydan keiin Qatpanov ózine qatysty las isti qasaqana uiymdastyrdy deidi kásipker.
Eks-depýtattyń sózine súiensek, Elenamen arasynda deneleri jaqyndasqan qarym-qatynas bolypty. Biraq ol munyń bári boijetkenniń kelisimimen jasalǵanyn aitady. Sebebi jaqyn qarym-qatynasqa deiin kásipker Elenamen uzaq ýaqyt habarlama alysyp júrgen.
"Ol osyǵan deiin menimen hat jazysqanda áiel men erkek arasynda bolatyndai qylymsyp júretin. Ekeýmizdiń jazysqan hattarymyz da bar. Ol óz erkimen menimen bardy. Al menen shyqqannan keiin Qaptanovqa "Men onymen jańa ǵana boldym" degen sms jiberipti. Zorlanǵan adam osylai jazady ma?
Bul kezde mektepte 100 shaqty adam jumys istep jatqan, biraq ol eshkimge eshnárse aitpaǵan. Munyń barlyǵy 5 tamyzda bolǵan edi. Odan keiin 11 tamyz kúni Elena maǵan habarlasyp, betpe-bet kezdeseiik dedi. Men dosymdy kóliktiń artqy júksalǵyshyna otyrǵyzyp alyp, bizdiń sóilesip jatqanymyzdy jazyp al dep ótindim. Sebebi ol bir búlik shyǵarady ma dep seziktendim.
Eger ol menen qoryqsa, jeke kelip kezdeser ma edi? 15 tamyz kúni bizdi bettestirgen edi. Sonda ol meniń sońǵy ret 5 tamyzda kórgenin aitty. Men ekeýmizdiń jolyqqanymyzdy jazyp alǵan diskti kórsetkenimde AIIB-de shý shyǵardy.
Taǵy bir eskere ketetin jáit, ol qyz jasyryn páterde turyp jatqanyn aitqan. Biraq ózin kúzetý týraly ótinishti Halikovtyń aqsha bopsalaý týraly isi bastalǵanda jazady", - dedi kásipker.
Rinat Halikov kásipkerden aqsha bopsalaǵany úshin jeti jylǵa bas bostandyǵynan aiyryldy. Ol Sqaqovtyń tanystary arqyly bailanysqa shyǵyp, onymen kezdesýdi uiymdastyrǵan. Sodan keiin kásipkerge óziniń oiyndaǵy jospardy aityp, odan qutylý úshin qolma-qol qarajat suraǵan. Derekterdiń barlyǵy espke alynyp, qujattar arqyly sotta dáleldendi.
Bloger kásipkerden alǵashynda 10 myń dollar berýin talap etken. Al odan keiin suranysy arta beripti.
Esterińizge sala keteiik, Shyǵys Qazaqstan oblysy Oktiabrskoe aýylynyń 19 jastaǵy turǵyny eks-depýtat, ári iri firma basshysynan zorlyq kórgenin aityp, politsiiaǵa shaǵym túsirgen edi.
Boijetken Ivanova Astana qalasyna baryp qoqan-loqqyǵa tap bolǵanyn, al bilik kómektespei jatqanyn aityp shaǵymdanǵan bolatyn.
Al bloger aiyptalǵan eks-depýtat Sqaqovtan 30 000 dollar bopsalaǵan.
