Ekonomist Ǵalymjan Aitqazin teńge baǵamynyń qubylýyna qatysty pikir bildirdi, dep habarlaidy QazAqparat.
«Resei men Batys arasyndaǵy qarym-qatynas birjaqny órbip jatyr. Tek nasharlap barady. Progreske uqsaityn bir de bir faktor baiqalyp turǵan joq. Saldarynan rýbl keshe taǵy quldyrady. Aiyrbastaý beketterinen bólek bankterdiń qosymshalarynda da dollarǵa degen suranys ósti. Onyń teńgege áser etkenin kórip otyrmyz.
Keibir jeli qoldanýshylar rýbldiń konvertatsiiasyna qatysty usynystar aityp jatyr. Jalpy biz Reseimen aradaǵy qarym-qatynasty qalaǵan ýaqytta úze sala almaimyz. Óitkeni saýda bailanysymyz óte tyǵyz. Ondai sheshimder eki jaqqa da tiimsiz bolady. Sony túsiný kerek. Aradaǵy saýda qatynasynyń aýqymy óte úlken, sondyqtan bul ońai sharýa emes. Ekonomikaǵa birden áser etedi», - dedi sarapshy.
Mamannyń paiymynsha, qazirgi tańda baibalamǵa salynbai, teńge baǵamynyń turaqtanýyn kútý eń durys qadam bolmaq.
«Ulttyq bank te eń tiimdi baǵamdy ornatýǵa tyrysady. Naryqtaǵy ahýal qiyn bolyp tur. Erekshe ahýal deýge de bolady. Aiyrbastaý beketteri de qyzmetin ýaqytsha toqtatyp jatyr. Olar da teńge baǵamy qandai bolatynyn bilmei otyr. Óitkeni KASE-de áli málimet joq. Sony paidalanyp alypsatarlyqqa barsa, zań boiynsha jazaǵa tartylady.
Qazir valiýta narǵyndaǵy kóleńkeli spekýliatsiia týraly alypqashpa áńgime kóp. Ony túsiný úshin halyqaralyq valiýta naryǵyn qaraý kerek. Mysaly, Forex-te álem boiynsha saýda jasalady. Onda 1-2 adam kirip, spekýliatsiia jasaidy deý kishkene qisynsyz dúnie. Sondyqtan qazir teńgege túsip jatqan qysymnyń negizgi bóligi syrtyq naryqtaǵy jaǵdaimen tikelei bailanysty. KASE-de alypsatarlyq áreketter bar shyǵar. Biraq qazir naryq faktory óz degenin istep jatqanyn kórip otyrmyz.
Mundai kezde sheteldik valiýta satyp alý kerek pe, álde múlik satyp alý kerek pe, ony árkim ózi sheshedi. Eń bastysy baibalamǵa salynbaý kerek. Ishtegi baibalam bankterge qysym týdyrady», - dedi Ǵalymjan Aitqazin.
