QR Ekologiia, geologiia jáne tabiǵi resýrstar ministrligi Sý resýrstary komitetiniń mamandary «Taý-Ken Samuryq» ulttyq taý-ken kompaniiasy» AQ-nyń Almaty oblysynyń Balqash aýdanyndaǵy jobasyna teris baǵa berdi, dep habarlaidy "Ult aqparat" ministrliktiń baspasóz qyzmetine slteme jasap.
Kompaniia geologiialyq barlaý úshin qarastyryp jatqan aýmaqtar respýblikalyq mańyzy bar tabiǵi qoryqshanyń shekarasynda ornalasqan.
«Erekshe qorǵalatyn tabiǵi aýmaqtar týraly» zańǵa sáikes, keshendi memlekettik tabiǵi qoryqshalarda tabiǵi keshenderge, ósimdikter men janýarlardyń introdýktsiiasyna qaýip tóndiretin sharýashylyq qyzmet júrgizýge tyiym salynady. Atalǵan zań normalarynda «jarylysqa, ziiandy tehnologiia men tehnikany, jerdi jyrtýǵa» tyiym salynatyny da jazylǵan.
«Osyǵan bailanysty Ekologiia ministrliginiń Sý resýrstary komitetiniń mamandary qoryqsha aýmaǵynda geologiialyq barlaý júrgizý durys emes dep sanaidy. Ministrlik sarapshylarynyń baǵalaýynsha, Ile ózeniniń saǵasy geologiialyq barlaý jumysyn júrgizý jerústi jáne jerasty sýlaryna, sonymen birge Ileniń ekojúiesine teris áserin tigizedi.
Ile ózeni Balqash kóline quiar tusta aýmaǵy 8 myń sharshy shaqyrymdy quraityn atyraýǵa (delta) ainalady. Elimizdegi saqtalyp qalǵan jalǵyz delta kólmen gidravlikalyq bailanysta jáne ol ekojúiedegi ekologiialyq tepe-teńdikti ustap turýda tabiǵi retteýshi rólin atqarady.
Balqash shuńǵymasyndaǵy intensivti sharýashylyq qyzmet kólge qaýip tóndirip, keri saldarǵa aparyp soqtyrýy múmkin», delingen habarlamada.
Ministrlik mamandary, optimaldy gidrologiialyq rejimdi ustap turý úshin delta ýchaskesinde ondaǵy qalyptasqan jaǵdaidy ózgertetin irrigatsiialyq jumystardy toqtatý kerek dep sanaidy.
