Qazaqstannyń Ekologiia, geologiia jəne tabiǵi resýrstar ministri Maǵzum Myrzaǵaliev 16 jeltoqsanda Qyrǵyz Respýblikasyna jumys saparymen baryp, birqatar sý-energetikalyq saladaǵy yntymaqtastyq məselesin talqylady.
Ministrdiń sapary Memleket basshysy Qasym-Jomart Toqaevtyń Qyrǵyzstanǵa jýyrdaǵy memlekettik saparynan keiin ótkizildi. Ol Qazaqstan Prezidentiniń Qyrǵyzstan prezidenti Sooronbai Jeenbekovpen kezdesýinde kóterilgen sý salasyndaǵy birqatar məselelerdi sheshý qajettiliginen týyndady.
Bishkekke sapary barysynda M. Myrzaǵaliev Qyrǵyzstan Respýblikasynyń birinshi premer-ministri Kýbatbek Boronovpen, Jogorký Kenesh tóraǵasy Dastanbek Djýmabekovpen, sondai-aq Qyrǵyz Respýblikasy úkimeti janyndaǵy memlekettik Sý resýrstary agenttiginiń direktory Kokýmbek Tashtanalievpen kezdesti.
Kelissózder barysynda Ekologiia ministrligi basshysy Qazaqstannyń Tuńǵysh Prezidenti Nursultan Nazarbaevtyń Ortalyq-Aziialyq sý-energetikalyq konsortsiým qurý týraly bastamasyn bishkektik əriptesterdiń esine salyp, oǵan qaita oralýdy, birlese kúsh salýdy iske asyrý múmkindigin usyndy.
Sondai-aq M. Myrzaǵaliev Qyrǵyz Respýblikasynyń Halyqaralyq Araldy qutqarý qoryndaǵy (HAQQ) yntymaqtastyǵyn qaita jańǵyrtý məselesin kóterdi.
Bishkek 2015 jyldan bastap, óziniń HAQQ pen onyń organdaryna qatysýyn shektei turǵan bolatyn.
«Biz tek birlese kúsh salýdyń arqasynda ǵana Aral sý alabynyń transshekaralyq ózenderiniń sý-energetikalyq resýrstaryn ortaq paidalaný məselesi sekildi kúrdeli problemany oń sheshý múmkin bolatynyna kóz jetkizýdemiz. Tiimdilikti kúsheitý maqsatynda onyń qyzmetin jetildirý boiynsha is-sharalar belgilengen. Qazaqstan qyrǵyzdyq taraptyń bul məsele jónindegi usynystaryn talqylap, keńester berýge daiyn», - dedi Qazaqstannyń Ekologiia, geologiia jəne tabiǵi resýrstar ministri.
Ministr sondai-aq Shý ózeni sý alabyna qyrǵyzdyq taraptyń sý berý kestesi týraly məsele kóterdi. Onyń aitýynsha, bul məseleni sheshý maqsatynda onlain-rejimde gidrologiialyq derekterdi almasý júiesin engizý qajet.
«Bul məseleniń aiqyn júrgizilýi sý sharýashylyǵy salasyndaǵy ózara senimdi arttyryp, yntymaqtastyqty kúsheitedi», - dedi M. Myrzaǵaliev.
Taraptar sondai-aq Syrdariia ózeni sý alabynyń sý-energetikalyq resýrstaryn paidalaný men Qazaqstan men Qyrǵyzstan arasyndaǵy sý qatynastarynyń basqa da məseleleri jónindegi ekijaqty yntymaqtastyqty keńeitý usynystaryn əzirleý boiynsha jumys tobynyń qyzmetin talqylady. Qazaqstan tarapynan bul jumys tobyn Ekologiia, geologiia jəne tabiǵi resýrstar vitse-ministri Sergei Nikolaevich Gromov basqardy.
Ekologiia ministrligi basshysy qyrǵyzdyq əriptesterge tiisti memlekettik organnyń osy jumys tobyndaǵy laýazymdy tulǵasyn belgileýdi, sondai-aq taiaý ýaqytta onyń birinshi otyrysyn ótkizýdi usyndy.
Kezdesýge qatysýshylar sondai-aq Syrdariia ózeniniń sý alabyndaǵy sý sharýashylyǵynyń jaǵdaiyn da qozǵady.
