قازاقستاننىڭ ەكولوگييا, گەولوگييا جəنە تابيعي رەسۋرستار مينيسترٸ ماعزۇم مىرزاعاليەۆ 16 جەلتوقساندا قىرعىز رەسپۋبليكاسىنا جۇمىس ساپارىمەن بارىپ, بٸرقاتار سۋ-ەنەرگەتيكالىق سالاداعى ىنتىماقتاستىق مəسەلەسٸن تالقىلادى.
مينيستردٸڭ ساپارى مەملەكەت باسشىسى قاسىم-جومارت توقاەۆتىڭ قىرعىزستانعا جۋىرداعى مەملەكەتتٸك ساپارىنان كەيٸن ٶتكٸزٸلدٸ. ول قازاقستان پرەزيدەنتٸنٸڭ قىرعىزستان پرەزيدەنتٸ سوورونباي جەەنبەكوۆپەن كەزدەسۋٸندە كٶتەرٸلگەن سۋ سالاسىنداعى بٸرقاتار مəسەلەلەردٸ شەشۋ قاجەتتٸلٸگٸنەن تۋىندادى.
بٸشكەككە ساپارى بارىسىندا م. مىرزاعاليەۆ قىرعىزستان رەسپۋبليكاسىنىڭ بٸرٸنشٸ پرەمەر-مينيسترٸ كۋباتبەك بورونوۆپەن, جوگوركۋ كەنەش تٶراعاسى داستانبەك دجۋمابەكوۆپەن, سونداي-اق قىرعىز رەسپۋبليكاسى ٷكٸمەتٸ جانىنداعى مەملەكەتتٸك سۋ رەسۋرستارى اگەنتتٸگٸنٸڭ ديرەكتورى كوكۋمبەك تاشتاناليەۆپەن كەزدەستٸ.
كەلٸسسٶزدەر بارىسىندا ەكولوگييا مينيسترلٸگٸ باسشىسى قازاقستاننىڭ تۇڭعىش پرەزيدەنتٸ نۇرسۇلتان نازارباەۆتىڭ ورتالىق-ازييالىق سۋ-ەنەرگەتيكالىق كونسورتسيۋم قۇرۋ تۋرالى باستاماسىن بٸشكەكتٸك əرٸپتەستەردٸڭ ەسٸنە سالىپ, وعان قايتا ورالۋدى, بٸرلەسە كٷش سالۋدى ٸسكە اسىرۋ مٷمكٸندٸگٸن ۇسىندى.
سونداي-اق م. مىرزاعاليەۆ قىرعىز رەسپۋبليكاسىنىڭ حالىقارالىق ارالدى قۇتقارۋ قورىنداعى (حاقق) ىنتىماقتاستىعىن قايتا جاڭعىرتۋ مəسەلەسٸن كٶتەردٸ.
بٸشكەك 2015 جىلدان باستاپ, ٶزٸنٸڭ حاقق پەن ونىڭ ورگاندارىنا قاتىسۋىن شەكتەي تۇرعان بولاتىن.
«بٸز تەك بٸرلەسە كٷش سالۋدىڭ ارقاسىندا عانا ارال سۋ الابىنىڭ ترانسشەكارالىق ٶزەندەرٸنٸڭ سۋ-ەنەرگەتيكالىق رەسۋرستارىن ورتاق پايدالانۋ مəسەلەسٸ سەكٸلدٸ كٷردەلٸ پروبلەمانى وڭ شەشۋ مٷمكٸن بولاتىنىنا كٶز جەتكٸزۋدەمٸز. تيٸمدٸلٸكتٸ كٷشەيتۋ ماقساتىندا ونىڭ قىزمەتٸن جەتٸلدٸرۋ بويىنشا ٸس-شارالار بەلگٸلەنگەن. قازاقستان قىرعىزدىق تاراپتىڭ بۇل مəسەلە جٶنٸندەگٸ ۇسىنىستارىن تالقىلاپ, كەڭەستەر بەرۋگە دايىن», - دەدٸ قازاقستاننىڭ ەكولوگييا, گەولوگييا جəنە تابيعي رەسۋرستار مينيسترٸ.
مينيستر سونداي-اق شۋ ٶزەنٸ سۋ الابىنا قىرعىزدىق تاراپتىڭ سۋ بەرۋ كەستەسٸ تۋرالى مəسەلە كٶتەردٸ. ونىڭ ايتۋىنشا, بۇل مəسەلەنٸ شەشۋ ماقساتىندا ونلاين-رەجٸمدە گيدرولوگييالىق دەرەكتەردٸ الماسۋ جٷيەسٸن ەنگٸزۋ قاجەت.
«بۇل مəسەلەنٸڭ ايقىن جٷرگٸزٸلۋٸ سۋ شارۋاشىلىعى سالاسىنداعى ٶزارا سەنٸمدٸ ارتتىرىپ, ىنتىماقتاستىقتى كٷشەيتەدٸ», - دەدٸ م. مىرزاعاليەۆ.
تاراپتار سونداي-اق سىردارييا ٶزەنٸ سۋ الابىنىڭ سۋ-ەنەرگەتيكالىق رەسۋرستارىن پايدالانۋ مەن قازاقستان مەن قىرعىزستان اراسىنداعى سۋ قاتىناستارىنىڭ باسقا دا مəسەلەلەرٸ جٶنٸندەگٸ ەكٸجاقتى ىنتىماقتاستىقتى كەڭەيتۋ ۇسىنىستارىن əزٸرلەۋ بويىنشا جۇمىس توبىنىڭ قىزمەتٸن تالقىلادى. قازاقستان تاراپىنان بۇل جۇمىس توبىن ەكولوگييا, گەولوگييا جəنە تابيعي رەسۋرستار ۆيتسە-مينيسترٸ سەرگەي نيكولاەۆيچ گروموۆ باسقاردى.
ەكولوگييا مينيسترلٸگٸ باسشىسى قىرعىزدىق əرٸپتەستەرگە تيٸستٸ مەملەكەتتٸك ورگاننىڭ وسى جۇمىس توبىنداعى لاۋازىمدى تۇلعاسىن بەلگٸلەۋدٸ, سونداي-اق تاياۋ ۋاقىتتا ونىڭ بٸرٸنشٸ وتىرىسىن ٶتكٸزۋدٸ ۇسىندى.
كەزدەسۋگە قاتىسۋشىلار سونداي-اق سىردارييا ٶزەنٸنٸڭ سۋ الابىنداعى سۋ شارۋاشىلىعىنىڭ جاعدايىن دا قوزعادى.
