WBC, WBA (Super), IBF jáne IBO tujyrymdary boiynsha álem chempiony qazaqstandyq Gennadii Golovkin ekinshi balasy dúniege keletinin málimdedi. Bul týraly boksshy L'Equipe frantsýz gazetine bergen suhbatynda aitty, - dep habarlaidy Vesti.kz.
"AQSh-ta ózimmen birge baýyrym Maksim júr, sebebi ol komandanyń bir bólshegi, bapker. Qasymda áielim men balam da bar, ulym amerikalyq mektepte oqyp, árdaiym qýantyp júr. Áielim júkti. Ekinshi balany kútip júrmiz. Ol osynda, AQSh-ta týady", - dedi Golovkin.
Aita keteiik, biyl 7 shildede 35 jastaǵy Golovkin úilengenine 10 jyl tolǵanyn toilady. Bul birdei sandarǵa keletin kúni atalyp ótti - 7.07.2007. Onyń áieli Alina da Qaraǵandynyń týmasy, ózi jaily internette jariia ete bermeidi. Jup toiǵa deiin jeti jyl kezdesip júripti. Alina Golovkinanyń eki joǵary bilimi bar, alaida otbasy úshin mansabynan bas tartqan. 2009 jyly olardyń Vadim esimdi balasy dúniege kelgen, onyń esimi boksshynyń qaitys bolǵan aǵasynyń qurmetine qoiylǵan. Bala hokkeimen ainalysady.
