Kópqabatty úilerdiń birindegi turǵyndar dabyl qaǵýda – páterlerdiń birindegi balkon ornynan «jyljyp» ketip, eden dirildegen, dep habarlaidy QazAqparat tilshisi.
«Óte shuǵyl. Astanadaǵy kópqabatty úilerdiń birindegi balkon ornynan «jylji» bastady. Maǵan habarlasqan kórshiniń aitýynsha, joǵary qabatta turatyn turǵyndardyń edeninde jaryqtar paida bolǵan. Mekenjaiymyz: «Orbita» turǵyn úi kesheni, Petrov kóshesindegi 10-úi. Qurmetti jergilikti atqarýshy organdar, nazar aýdarýlaryńyzdy suraimyn!», - dep jazdy Facebook-tegi topta Nail Rinatovich degen qoldanýshy.
Ol áleýmettik jelidegi atalmysh turǵyn úidiń videosy men fotosýretter jariialandy. Fotodan balkonnyń plastik tereze qabyrǵasy maiysa bastaǵanyn kórýge bolady.
Qalalyq ákimdiktiń habarlaýynsha, olar problemasy bar turǵyn úi týraly biledi. Qazirgi ýaqytta ol jaqta tehnikalyq tekserý júrgizilip jatyr, odan keiin úidiń apattyq deńgeii anyqtalady.
