Amerika Qurama Shtattarynda ótip jatqan prezident sailaýynda demokratiialyq partiia atynan baq synaǵan Djo Baiden 7 qarashada Pensilvaniia shtatynda qazirgi prezident Donald Tramptan basym tústi.
Osylaisha, ol AQSh prezidenti atanýǵa qajet daýysty jinap otyr.
CNN men AP málimetinshe, sailaý barysynda 77 jastaǵy Baiden tańdaýshylardyń 273 daýsyn jinap, AQSh-tyń qazirgi prezidenti, respýblikalyq partiia úmitkeri Donald Trampty basyp ozǵan.
Prezident ataný úshin kandidat kem degende 270 daýys jinaýy tiis. Baiden Pensilvaniia shtatynda ózine jetpei turǵan daýys kólemin jinap, qarsylasynan qara úzip ketti. Ol aradaǵy alshaqtyqty 31 myń daýysqa deiin arttyrǵan.
Alaida Pensilvaniia men daýys berý áli túbegeili aiaqtalmaǵan Djordjiia, Nevada men Arizona shtatynda da alda keledi.
Baiden Twitter-de sailaýshylaryna alǵys bildirip, barlyq amerikalyqtardyń prezidenti bolýǵa ýáde berdi.
Baidenniń prezident sailaýyndaǵy qarsylasy, AQSh-tyń qazirgi prezidenti Donald Tramp jeńilgenin áli moiyndaǵan joq. Munyń aldynda ol Twitter-de jeńiske jetkenin málimdegen edi.
Tramptyń zańgerleri daýys aiyrmashylyǵy mardymsyz bolǵan Pensilvaniia, Michigan, Djordjiia siiaqty shtattarda daýystardy qaita sanatqyzýy yqtimal.
Sailaýshylar alqasy prezidentti 14 jeltoqsannan keiin resmi túrde sailaýy tiis.
Al, Prezidenttiń merzimi keler jyldyń 20 qańtarynda bastalady.
Aita ketý kerek, bul sailaýda Djo Baiden AQSh tarihynda osy laýazymǵa úmitker bolǵan búkil kandidattan kóp daýys jinady. AP málimetine sensek, qazirgi tańda sanalǵan biýlletenderdiń 74,8 milliony Baidenge daýys bergen. Al 70,5 million sailaýshy Donald Trampty qoldaǵan.
Amerikanyń eks-prezidenti Barak Obama 2008 jyly 66 million daýys jinasa, qazirgi prezident Donal Tramp 2016 jyly 62 million sailaýshynyń senimine ie bolǵan edi. Demek, Baiden buǵan deiingi rekordtyń bárinen basym túsip otyr. Degenmen ereje boiynsha prezident sailaýynyń jeńimpazy sailaýshylardyń emes, tańdaýshylardyń daýsyna qarai belgili bolady.
2009 jyly Djo Baiden Amerikanyń 47-shi vitse-prezidenti atanyp, Barak Obamamen birge qyzmetine kirisken bolatyn. Ol 2017 jylǵa deiin osy laýazymda eńbek etti. Oǵan deiin Baiden 35 jyl boiy Delaver shtaty atynan senator bolǵan.
