Mańǵystaý oblysynda Djeki Channyń qatysýymen «Qudaidyń saýyty 4: Ýltimatým» atty halyqaralyq kinojobanyń túsirilim jumystary bastaldy, dep habarlaidy ult.kz.
Jobany otandyq eki kinokompaniia – Sálem Entertainment pen Dala Edge Creative Tech Park birlese júzege asyrýda. Bul bastama otandyq kinoindýstriiany damytýǵa jáne iri halyqaralyq jobalardy tartýǵa belsendi yqpal etip otyrǵan Qazaqstan Respýblikasy Mádeniet jáne aqparat ministrliginiń qoldaýymen múmkin boldy. Óz kezeginde, óńirdegi túsirilim protsesine Mańǵystaý oblysynyń ákimdigi jan-jaqty qoldaý kórsetýde.
Shyǵarmashylyq top 7-12 maýsym aralyǵynda jumystyń alǵashqy kezeńin ótkizip, aimaqtyń qaitalanbas tabiǵi kórinisterin taspaǵa basty. Filmniń negizgi túsirilim oryndarynyń biri – álemge áigili Bozjyra shatqaly. Túsirilim jumystaryn bastamas buryn aýqymdy daiyndyq júrgizildi: 2025 jyly óńirdegi qolaily tabiǵi lokatsiialardy irikteý sharalary ótkizildi. Kinotýyndynyń álemdik premerasy 2027 jyldyń aqpan aiyna josparlanǵan.
Tabiǵi nysandardy tanymal kinofranshizalarǵa integratsiialaý – kinotýrizmdi damytýdyń tanymal quraly. BUU Dúniejúzilik týristik uiymynyń (UN Tourism) málimetinshe, sátti shyqqan filmder túsirilgen óńirlerde týrister aǵyny orta eseppen 25-40% aralyǵynda ósedi. Jańa Zelandiia, Ulybritaniia, Horvatiia, Ońtústik Koreia, Tailand jáne taǵy basqa birqatar memleketterdiń halyqaralyq tájiribesi kinodaǵy tanymal peizajdar túsirilim oryndaryna arnaiy keletin sheteldik saiahatshylardyń turaqty ári uzaqmerzimdi aǵynyn qamtamasyz etetinin dáleldep otyr.
Filmniń halyqaralyq naryqqa shyǵýy Qazaqstanǵa sheteldik týristerdi tartýǵa jańa serpin beredi. Mańǵystaýdyń biregei lokatsiialaryn úlken ekrandardan kórsetý milliondaǵan sheteldik kórermendi elimizdiń tabiǵi nysandarymen tanystyrýǵa jol ashady. Bul aimaqtyń jahandyq naryqtaǵy tanymaldylyǵyn arttyryp, Qazaqstannyń tartymdy týristik baǵyt retindegi halyqaralyq imidjin nyǵaita túsedi.
