Foto: Pexels.com
Qazaqstan Respýblikasy Densaýlyq saqtaý ministrligi emhanalardy qarjylandyrý tártibin ne úshin ózgertkenin túsindirdi, dep habarlaidy Ult.kz.
Reformanyń negizgi maqsaty — meditsinalyq kómektiń sapasyn arttyryp, qarjyny naqty qyzmet kórsetilgen jerge baǵyttaý.
Buǵan deiin emhanalar azamattardyń naqty qaralǵan-qaralmaǵanyna qaramastan, tek tirkelgen adamdar sanyna qarai qarjy alyp kelgen. Sonyń saldarynan 4 millionnan astam adam (shamamen 22%) meditsinalyq kómekke júginbese de, olar úshin biýdjetten qarjy bólingen.
Mamandardyń aitýynsha, bul júie profilaktikanyń álsireýine ákelgen. Kóp jaǵdaida azamattar dárigerge tek jaǵdaiy asqynǵanda ǵana qaralady. Qazirgi tańda statsionarǵa jatqyzylatyn ár 10 jaǵdaidyń 7-eýi shuǵyl túrde júzege asady, al olardyń bir bóligin emhana deńgeiinde aldyn alýǵa bolar edi.
Jańa tártip boiynsha, eger patsient bir jyldan astam ýaqyt emhanaǵa júginbese, oǵan bólinetin tarif azdap tómendetiledi. Alaida bul shara jazalaý emes — qarjylandyrýdyń negizgi bóligi saqtalady. Basty maqsat — emhanalardy patsienttermen belsendi jumys isteýge yntalandyrý.
Endi meditsinalyq uiymdar azamattardy profilaktikalyq tekserýlerge jii shaqyryp, skriningter týraly eskertip, sozylmaly aýrýlardy turaqty baqylaýǵa kóbirek kóńil bóledi. Bul aýrýlardy erte anyqtap, emdeýdi jeńildetýge múmkindik beredi.
Sondai-aq, meditsina qyzmetkerlerine naqty nátijeler úshin qosymsha tólemder qarastyrylǵan. Atap aitqanda, onkologiialyq aýrýlardy, týberkýlezdi erte anyqtaý jáne sozylmaly dertterdi baqylaý kórsetkishteri eskerilmek. Osylaisha, júie birtindep kórsetilgen qyzmettiń sanyna emes, sapasy men nátijesine qarai qarjylandyrýǵa kóshýde.
Aita keteiik, keibir jekemenshik emhanalar jańa ózgeristermen kelispei, tabystyń tómendeýinen qaýiptenip, sotqa júgingen.
Ministrlik ókilderi bul reformalar kezeń-kezeńimen júzege asyrylyp jatqanyn atap ótti. 2024 jyldan bastap josparly emdeýge jatqyzý úshin qajetti tekserýler sany qysqartylyp, dárigerlerdiń júktemesi ońtailandyrylǵan. Sonymen qatar meiirgerlerdiń ókilettigi keńeitilip, dárigerlerge patsient qabyldaýǵa kóbirek ýaqyt bólingen.
2025 jyldyń sáýirinen bastap eńbekaqy tóleý modeli de jańartyldy. Endi meditsina qyzmetkerleriniń tabysy ana men náreste ólimin azaitý, júrek-qantamyr aýrýlarynyń aldyn alý jáne qaýipti dertterdi erte anyqtaý nátijelerine bailanysty bolady.
Vedomstvonyń málimetinshe, halyqpen belsendi jumys júrgizgen jaǵdaida bir ýchaskege bólinetin qarjy kólemi toqsanyna 344 myń teńgeden 700 myń teńgege deiin artqan.
Ministrlik bul ózgeristerdiń barlyǵy aýrýlardyń aldyn alý, asqynýlardy azaitý jáne halyqtyń ómir súrý sapasyn arttyrýǵa baǵyttalǵan jańa modelge kóshý aiasynda qolǵa alynǵanyn málimdedi.
