Foto: gov.kz
Mańǵystaý oblysynda Aqtaý turǵyny men salyq organy arasyndaǵy daýly is sotta qaraldy. Kameralyq baqylaý nátijesinde jiberilgen habarlama azamattyń jyljymaityn múlikti satýynan túsken kiristi deklaratsiialamaǵany jáne jeke tabys salyǵyn tólemegeni týraly talapqa negizdelgen bolatyn, dep habarlaidy Ult.kz.
Sottyń málimetinshe, salyq organy eseptegen zańbuzýshylyq somasy 887 500 teńgeni qurady. Buǵan kelispegen azamat sotqa júgindi.
Is barysynda daýly páterdiń tarihy anyqtaldy: turǵyn úi 2004 jyly erli-zaiyptylarǵa aiyrbastaý sharty arqyly berilgen. Sol kezde olar Aqtaýdyń 11-shaǵyn aýdanyndaǵy páterin 27-shaǵyn aýdandaǵy baspanaǵa aýystyryp, qosymsha 1 million teńgeden astam tólem jasaǵan.
2023 jyly er adam áielinen páterdiń jarty úlesin 8 million teńgege satyp alyp, múlikti tolyq óz atyna rásimdegen. Al 2024 jyly bul páter 16 875 000 teńgege satylǵan.
Salyq organy tabysty esepteý kezinde tek 2023 jylǵy satyp alynǵan 8 million teńgeni negizge alǵanymen, múliktiń jartysyna azamat 2004 jyldan beri ielik etkenin eskermegen.
Sot sondai-aq salyqty durys esepteý úshin múlik alynǵan kezdegi kadastrlyq qun suralmaǵanyn atap ótti.
Nátijesinde salyq organdarynyń habarlamasy zańsyz dep tanylyp, kúshi joiyldy. Sheshim ázirge zańdy kúshine engen joq. Sonymen qatar, jaýapker organǵa qatysty jeke uiǵarym shyǵaryldy.
