QR DSM sanitarlyq-epidemiologiialyq baqylaý komiteti tóraǵasynyń orynbasary Nurlybek Asylbekov dári-dármek salasyndaǵy zań buzýshylyqtar týraly aitty, dep habarlaidy "Ult aqparat".
«Memleket basshysynyń dári-dármek baǵasynyń negizsiz ósýine jol bermeý tapsyrmasyn oryndaý maqsatynda dárilik zattardyń baǵasyn baqylaýdy qamtamasyz etý turǵysynda oblystar men respýblikalyq mańyzdaǵy qalalarda monitoringilik toptar quryldy. Olardyń quramyna bizdiń komitettiń aýmaqtyq bólimsheleri, jergilikti atqarýshy ári quqyq qorǵaý organdary engizildi. Monitoringilik toptarmen 1640-tan astam dárihana qamtylyp, shekti baǵadan asyp satylǵan dárilik zattardyń 199 ataýy anyqtaldy», - dedi N. Asylbekov Ortalyq kommýnikatsiialar qyzmetinde.
Onyń sózine qaraǵanda, biylǵy 15 shildeden 9 qarashaǵa deiin 174 mln teńge somasyna shekti baǵanyń artýynyń 876 faktisi, 39,4 mln teńge somasyna dárilik zattardy zańsyz ótkizýdiń 347 faktisi anyqtaldy. Munymen qosa, 1223 ákimshilik hattama toltyrylyp, 213 mln teńgeden astam somada aiyppul salyndy. Zańsyz ainalymnan 10 mln-nan astam dári-dármek pen meditsinalyq zattar alyndy.
Budan buryn habarlanǵandai, Nurlybek Asylbekov elimizdegi dárilik zattardyń qoryna qatysty túsinik berdi. Qazirgi kezde dárihanalarda halyqtyń dárilik zattarǵa qajettiligin qamtamasyz etý úshin preparattar jetkilikti.
