Syrtqy ekonomikalyq qyzmettiń adal qatysýshylarynyń quqyqtaryna qysym jasalmaidy. Bul týraly QR Ulttyq bankiniń tóraǵasy Erbolat Dasaev aitty, dep habarlaidy QazAqparat tilshisi.
«Qylmystyq kiristi zańdastyrýǵa jáne terrorizmdi qarjylandyrýǵa qarsy is-qimyl jónindegi jumys aiasynda Qazaqstan 2022 jyly alda bolatyn Kiristerdi jylystatýǵa/terrorizmdi qarjylandyrýǵa qarsy is-qimyl (KJ/TQQ) zańnamasy men ulttyq júiesiniń halyqaralyq standarttar men FATF talaptaryna tehnikalyq sáikestigin ózara baǵalaýǵa belsendi daiyndyqty jalǵastyrady. Ol úshin kúmándi transshekaralyq operatsiialarǵa qoldanylatyn qarjy monitoringi sharalary kúsheitildi. Osy jylǵy 10 qańtarda Ulttyq banktiń, Qarjy monitoringi agenttigi men Qarjy naryǵyn retteý jáne damytý agenttiginiń birlesken buiryǵy qabyldandy. Onda kúsheitilgen qarjy monitoringine jatatyn transshekaralyq operatsiialardyń tizbesi bekitilip, operatsiialardy júrgizýge berilgen ótinimder boiynsha is-qimyl algoritmi belgilendi», - dedi ol Prezidenttiń biznes ókilderimen kezdesýinde.
Onyń aitýynsha, ekinshi deńgeidegi bankter úshin birlesken buiryqtyń normalaryn túsindirý Qazaqstan qarjygerleri qaýymdastyǵynyń qatysýymen jedel túrde júrgizildi.
«Úzdik álemdik praktikany eskere otyryp, ekinshi deńgeidegi bankter KYC (know your client) qaǵidattary sheńberinde táýekeli joǵary operatsiialardy jan-jaqty zerdeleý jumysyn kúsheitti. Aǵymdaǵy parlamenttik sessiianyń sońyna deiin qarjy monitoringi sharalaryn odan ári kúsheitýge jáne Ekonomikalyq yntymaqtastyq jáne damý uiymynyń (EYDU) standarttary boiynsha qarjy júiesine KYC qaǵidattaryn tolyq engizýge baǵyttalǵan zańnamalyq túzetýler blogyn ázirleý jáne qabyldaý qajet dep esepteimiz. Sizdiń tapsyrmańyzǵa sáikes rezidentter men beirezidentterdi qosa alǵanda, syrtqy ekonomikalyq qyzmettiń adal qatysýshylarynyń quqyqtaryna qysym jasalmaidy jáne halyqaralyq operatsiialardy júrgizýine shek qoiylmaidy», - dedi Erbolat Dosaev.
