"Dos-Muqasan" tobynyń ánshisi Murat Qusaiynov Nur-Sultan áýejaiynda bolǵan oqiǵaǵa qatysty túsinikteme berdi, dep habarlaidy Sputnik Qazaqstan tilshisi.
Buǵan deiin "Eir Astana" áýe kompaniiasynyń baspasóz qyzmeti Murat Qusaiynovty áýejai qyzmetkerine qol kóterip, densaýlyǵyna ziian keltirdi dep aiyptaǵan edi.
Alaida áigili "Dos-Muqasan" tobynyń ánshisi munyń bárin joqqa shyǵaryp otyr.
"Munyń bári – maǵan jasalǵan qiianat. Men "Eir Astanamen" únemi ushamyn, buryn-sońdy mundai jaǵdai bolǵan emes. Bári jala", - dedi Qusaiynov.
Onyń aitýynsha, áýejai qyzmetkerleri reis aldynda ánshiden aiaq kiimdi sheshýdi talap etken.
"Áýejaida kiim sheshtiredi, taǵysyn taǵy. Qalai tekseretinin bilesizder ǵoi. Men bárin oryndadym. Bir kezde aiaq kiimdi shesh dedi. Men sheshpeimin dedim. Eshqandai da qylmysker emespin, meni el tanidy, apta saiyn ushamyz dedim. Skaner bar ǵoi, sonymen tekserińizder dedim. Biraq olar bolmai qoidy. Sodan ashýlana bastadym, sózge kelip qaldyq. Biraq, qol jumsaǵan joqpyn. Bul ótirik", - dedi "Dos-Muqasan" tobynyń solisi.
Aitýynsha, áýejai qyzmetkerleri ony reiske jibermegen, sóitip ánshiniń bileti kúiip ketipti.
"Eir Astana"-men burynnan ushamyn. Bular keiingi kezderi adam syilamaityn bolǵan siiaqty. El biledi, halyq tanidy dep túsindirmek boldym, tyńdamady", - deidi ánshi.
"Eir Astana" áýe kompaniiasynyń baspasóz qyzmeti 14 sáýirde "Nur-Sultan – Almaty" baǵytyna qatynaityn KS 852 ushaǵynan tártipke baǵynbaǵan jolaýshy shyǵarylǵanyn habarlady. Olardyń málimetinshe, Murat Qusaiynov áýe kompaniiasy qyzmetkerleriniń kózinshe jolaýshylarǵa qyzmet kórsetý bólimi basshysynyń mańdaiyna qatty soqqy jasap, onyń densaýlyǵyna ziian keltirgen.
Osydan keiin áýe kompaniiasy Nur-Sultan qalasy áýejaiyndaǵy politsiia bólimine Murat Qusaiynovty jaýapqa tartý jáne sotqa deiingi tergeý júrgizý jóninde aryz túsirgen.
