Halyqaralyq Olimpiada komiteti 2008 jyly Beijińde ótken Olimpiada oiyndarynda doping paidalanǵan sportshylar tizimin jariialady. Olardyń qatarynda qazaqstandyq 5 sportshy bar, dep habarlaidy "Ult aqparat" Massaget portalyna silteme jasap.
HOK-tyń resmi habarlamasyndy «qara tizimge» uzyn sany 16 sportshy engen. Onyń 11-i júldegerler qatarynan kóringen.
Qazaqstandyq aýyr atlet Irina Nekrasova (kúmis) men Mariia Grabovetskaia (qola), erkin kúresten Áset Mámbetovtiń (qola) doping qoldanǵany birneshe kún buryn belgili bolǵan edi. Búgin bul qatardy aýyr atlet Vladimir Sedov (tórtinshi oryn) tolyqtyrdy. Sondai-aq Maiia Manezanyń da doping qoldanǵany resmi túrde habarlandy.
Doping paidalanǵandar qatarynda Reseiden 4 sportshy (Hasan Baroev – kúmis, Hadjimýrat Akkaev – qola, Dmitrii Lapikov – qola, Elena Slesarenko – IV oryn), Ýkrainadan 3 sportshy (Denis Iýrchenko – qola, Natalia Davydova – qola, Vita Palamar – V oryn), Ázirbaijannan 2 sportshy (Nizami Pashaev – V oryn, Vitalii Rahimov – kúmis), Belarýs ( Irina Kýlesha – IV oryn) jáne Grekiia elinen (Hrisopiia Devettsi – qola) bir-bir sportshydan bar.
Aita keteiik, osyǵan deiin Svetlana Podobedova, Zúlfiia Chinshanlo jáne Maiia Maneza da 2012 jylǵy Olimpiada medaldaryn keri qaitaratyn bolǵan edi. Sondai-aq, balýan Teimýraz Tigievtiń doping qoldanýyna bailanysty Beijiń Olimpiadasyndaǵy kúmis júldesinen aiyrǵan edi.
Aldaǵy ýaqytta HOK qazaqstandyq aýyr atletter Ilia Ilin men Almas Óteshovke qatysty sheshimin shyǵaratyn bolady.
