Qazaqstandyq júzý sheberi Dmitrii Balandin Tokio Olimpiadasyna joldama aldy, dep habarlaidy "Ult aqparat".
Ulttyq olimpiada komitetinen túsken málimetke qaraǵanda, D.Balandin Halyqaralyq sý sporty túrleri federatsiiasynyń (FINA) Champions Swim Series atty jańa týrnirine qatysty.
Álemdik jarystyń birinshi kezeńi Gýanchjoýda ótti.
Brass ádisimen 200 metrge júzý saiysynda qazaqstandyq sportshy 2:09.37 nátijemen tórtinshi orynǵa ie boldy. A normativiniń ýaqyty - 2:10.35. Osylaisha D.Balandin joldamany jeńip aldy.
Bul qashyqtyqta 2016 jylǵy Olimpiada oiyndarynyń qola júldegeri, reseilik Anton Chýpkov 2:07.48 ýaqytymen top jardy. Ekinshi orynda qytailyq Tsin Haiian. Onyń ýaqyty - 2:08.31. Japoniialyq Ippei Vatanabe 2:09.33 kórsetkishimen úshinshi orynǵa ie boldy.
Dmitrii Balandin sondai-aq 4h100 metr aralas estafetasyna qatysyp, onda qola júldege qol jetkizdi.
Champions Swim Series jarysynyń bási joǵary, onda tek arnaiy shaqyrtý alǵan kil myqtylar ǵana baq synai alady.
Bul jańa týrnirdiń ekinshi kezeńi 11 mamyrda Býdapesht qalasynda ótedi. Álemdik seriianyń sońǵy kezeńi 31 mamyr men 1 maýsym aralyǵynda AQSh-tyń Indianapolis qalasynda bolady.
Eske sala keteiik, brass ádisimen 200 metrge júzý saiysy - Dmitrii Balandinniń oń jambasyna keletin jarys. Dál osy qashyqtyqta ol 2016 jyly qarsylastarynyń bárin shań qaptyryp, qazaqstandyqtar arasynda júzýden tuńǵysh ret Olimpiada chempiony atanǵan bolatyn.
