22 qańtar kúni Shymkenttiń Qarataý aýdandyq sotynda "ózge dinge kirgeni úshin áielin pyshaqtaǵanyn" málimdegen Hairolla Narmetovtyń isi boiynsha sot úkimi shyqty.
Azattyq tilshisiniń habarlaýynsha, sýdia Ermahan Rahmanberdi Hairolla Narmetovti Qylmystyq kodekstiń 106-babynyń 1-bóligimen ("qasaqana aýyr dene jaraqatyn salý") aiypty dep tanyp, úsh jylǵa bas bostandyǵynan aiyrý jazasyn kesti. Sotqa Narmetovtiń advokaty, jábirlenýshi retinde áieli Ýmida Narmetova men onyń anasy qatysty.
Búgin úkim oqylǵanǵa deiin ótken jaryssózde prokýror Aslan Jumaǵulov Hairolla Narmetovtiń qylmysyna «shyn ókingenin» aityp, ony úsh jarym jylǵa bas bostandyǵynan aiyrýdy suraǵan bolatyn.
Sotta sońǵy sóz berilgen kezde jábirlenýshi Ýmida Narmetova ózine pyshaq salǵan kúieýi Hairolla Narmetovti «balalary úshin keshiretinin» aitty. Al Hairolla Narmetov isti ashýmen istegenin, onysyna qatty ókinetinin aityp, áieli men onyń anasynan keshirim surady. Ol sonymen qatar sottan balalary úshin ózine keshirim berip, jazasyn jeńildetýdi suraǵan.
Narmetovtiń advokaty onyń buryn sottalmaǵanyn jáne otbasyly ekenin eskerip, aiybyn jeńildetýdi jáne bas bostandyǵyn aiyrmaityndai jaza kesýdi suraǵan.
Esterińizge sala keteiik, bul is boiynsha sot 16 qańtarda bastalǵan.
Ońtústik Qazaqstan oblysy Sairam aýdanynyń 1983 jyly týǵan turǵyny Hairolla Narmetov byltyr qarasha aiynda eki aiǵa qamalǵan. Hairolla Narmetov 12 qarashada áielimen bolǵan janjaldan soń túsirgen video úndeýinde "áielimdi basqa dinge ótkeni úshin óltirdim" dep málimdegen. Bul video 13 qarashada áleýmettik jelige tarap ketken edi. Kúieýi pyshaq salǵan Ýmida Narmetova aýrýhananyń jansaqtaý bólimine túsken bolatyn.
