"Jańa tolqyn — 2018" baiqaýy kezinde qazaqstandyq ánshi Dimash Qudaibergenniń mikrofony qosylmai qaldy. Dese de otandasymyz esh múdirmesten ánin aitýdy jalǵastyra berdi.
Sochi qalasynda ótken "Novaia volna-2018" baiqaýynyń jabylý saltanatynda Dimash Qudaibergen Adagio ánin oryndady. Alaida ánshi sahna tórine shyqqannan keiin 20 sekýndtai mikrofon istemei turdy. Dese de, otandasymyz tehnikalyq aqaýǵa esh mán bermesten ánin aitýdy jalǵastyra berdi. Keiin tehnikalyq aqaý rettelip, mikrofony da qosyldy.
Án aiaqtalǵan soń fanattary Dimash Qudaibergendi gúl astynda qaldyrdy. Kópshilik ony sýretke túsirip úlgerip jatty.
"Muny birinshi kúni aitqan edim. Taǵy bir ret qaitalaiyn. Osy sátti Nikolai Baskov kórse ne isteitinin tipti bilmeimin… Dostar, Dimash Qudaibergenge gúl syilaýǵa júgirip kele jatqan áielderdiń úni ol sahnada shyǵaratyn dybyspen shamalas. Men ásirelep nemese qaljyńdap aityp turǵan joqpyn", — dep ázildegen boldy baiqaý júrgizýshisi Timýr Rodrigez.
Ári qarai sóz kezegin Dimash Qudaibergenov alyp, tyńdarmandarǵa alǵysyn aitty.
"Ruqsat bolsa, birer sóz aityp alǵys bildireiin degen edim. Sizderge án aitý múmkindigin syilaǵandaryńyz úshin alǵysym sheksiz. Uly maestro Igor Iakovlevich, meni shaqyrǵanyńyz úshin rahmet. Qazaqstanǵa kelińizder! Biz sizderdi jaqsy kóremiz", — dedi ol.
Ekinshi júrgizýshi Marina Kravets óz kezeginde gúlderdiń kóptigine qairan qalǵanyn jasyrmady.
"Dimash, siz munyń barlyǵyn qalai alyp ketpeksiz? Aityńyzshy", — dep surady ol.
Áleýmettik jeli qoldanýshylary atalǵan jaǵdaiǵa qatysty túrli pikir bildirip jatty. Biri tehnikalyq aqaý ádeii jasaldy dese, ekinshileri Timýr Rodrigezdiń osy mazmundas ázilderinen sharshaǵanyn jetkizdi.
