"جاڭا تولقىن — 2018" بايقاۋى كەزٸندە قازاقستاندىق ەنشٸ ديماش قۇدايبەرگەننٸڭ ميكروفونى قوسىلماي قالدى. دەسە دە وتانداسىمىز ەش مٷدٸرمەستەن ەنٸن ايتۋدى جالعاستىرا بەردٸ.
سوچي قالاسىندا ٶتكەن "نوۆايا ۆولنا-2018" بايقاۋىنىڭ جابىلۋ سالتاناتىندا ديماش قۇدايبەرگەن Adagio ەنٸن ورىندادى. الايدا ەنشٸ ساحنا تٶرٸنە شىققاننان كەيٸن 20 سەكۋندتاي ميكروفون ٸستەمەي تۇردى. دەسە دە, وتانداسىمىز تەحنيكالىق اقاۋعا ەش مەن بەرمەستەن ەنٸن ايتۋدى جالعاستىرا بەردٸ. كەيٸن تەحنيكالىق اقاۋ رەتتەلٸپ, ميكروفونى دا قوسىلدى.
ەن اياقتالعان سوڭ فاناتتارى ديماش قۇدايبەرگەندٸ گٷل استىندا قالدىردى. كٶپشٸلٸك ونى سۋرەتكە تٷسٸرٸپ ٷلگەرٸپ جاتتى.
"مۇنى بٸرٸنشٸ كٷنٸ ايتقان ەدٸم. تاعى بٸر رەت قايتالايىن. وسى سەتتٸ نيكولاي باسكوۆ كٶرسە نە ٸستەيتٸنٸن تٸپتٸ بٸلمەيمٸن… دوستار, ديماش قۇدايبەرگەنگە گٷل سىيلاۋعا جٷگٸرٸپ كەلە جاتقان ەيەلدەردٸڭ ٷنٸ ول ساحنادا شىعاراتىن دىبىسپەن شامالاس. مەن ەسٸرەلەپ نەمەسە قالجىڭداپ ايتىپ تۇرعان جوقپىن", — دەپ ەزٸلدەگەن بولدى بايقاۋ جٷرگٸزۋشٸسٸ تيمۋر رودريگەز.
ەرٸ قاراي سٶز كەزەگٸن ديماش قۇدايبەرگەنوۆ الىپ, تىڭدارماندارعا العىسىن ايتتى.
"رۇقسات بولسا, بٸرەر سٶز ايتىپ العىس بٸلدٸرەيٸن دەگەن ەدٸم. سٸزدەرگە ەن ايتۋ مٷمكٸندٸگٸن سىيلاعاندارىڭىز ٷشٸن العىسىم شەكسٸز. ۇلى ماەسترو يگور ياكوۆلەۆيچ, مەنٸ شاقىرعانىڭىز ٷشٸن راحمەت. قازاقستانعا كەلٸڭٸزدەر! بٸز سٸزدەردٸ جاقسى كٶرەمٸز", — دەدٸ ول.
ەكٸنشٸ جٷرگٸزۋشٸ مارينا كراۆەتس ٶز كەزەگٸندە گٷلدەردٸڭ كٶپتٸگٸنە قايران قالعانىن جاسىرمادى.
"ديماش, سٸز مۇنىڭ بارلىعىن قالاي الىپ كەتپەكسٸز? ايتىڭىزشى", — دەپ سۇرادى ول.
ەلەۋمەتتٸك جەلٸ قولدانۋشىلارى اتالعان جاعدايعا قاتىستى تٷرلٸ پٸكٸر بٸلدٸرٸپ جاتتى. بٸرٸ تەحنيكالىق اقاۋ ەدەيٸ جاسالدى دەسە, ەكٸنشٸلەرٸ تيمۋر رودريگەزدٸڭ وسى مازمۇنداس ەزٸلدەرٸنەن شارشاعانىن جەتكٸزدٸ.
