- Qazaqstandyq ánshi Dimash Qudaibergenov búgin Qytaidyń «Singer2017» án baiqaýyna qatysatyndyǵyn rastady.
Bul týraly Dimash óziniń jańa ǵana ashqan Qytailyq Sina Weibo (Týitterdiń balamasy) áleýmettik mikroblogynda jariialady. Paraqshaǵa jazylýshylardyń sany az ýaqyttyń ishinde 4 myńnan asqan.
Dimash qytailyq kórermenderge Weibo arqyly óziniń Hýnan telearnasynyń «Singer2017» telejobasyna qatysatyndyǵyn, sondai-aq ózine qoldaý kórsetýin suraǵan videosyn jariialady.
4 millionǵa jýyq oqyrmany bar Singer2017 uiymdastyrýshylarynyń arnaiy Weibo paraqshasynda jobaǵa qatysýshylardyń tolyq tizimi jáne afishasy jariialandy.
Aita keterligi, video kórsetilgennen keiin qoldaýshylar 500-ge jýyq pikir jazyp, Dimashtyń jobadaǵy ónerine sáttilik tiledi. Al sol eldegi qandastarymyz Dimashtyń ánin tyńdaýǵa qumar bolǵan qytailyqtar úshin arnaiy top quryp, ánderin júkteýge atsalysýda.
Eske sala keteiik, buǵan deiin Dimash Qudaibergenovtiń osy án baiqaýyna qatysatyndyǵy týraly habarlaǵan bolatynbyz. Dimashtyń qytailyq tanymal ánshi Han Hýnnyń «Tań atty» ánin sheber oryndaýy joba uiymdastyrýshylarynyń nazaryn aýdarǵan syńaily.
El ishinde tanymal jobaǵa Taivan, Makao, Singapýr jáne Koreia, sonymen qatar Qytaidyń eń tanymal juldyzdarynyń qatysatyny belgili.
Baiqaýdyń jalpy 5 irikteý kezeńi, sondai-aq, jartylai finaly jáne finaldyq saiystary 21 qańtardan 15 sáýir aralyǵynda Chansha qalasynda ótedi.
