Qazaqstandyq ánshi Dimash Qudaibergenov Qytaidaǵy I Am a Singer mýzykalyq konkýrsyn qatysyp, teleshoýdyń birinshi konkýrs kúniniń jeńimpazy boldy. Aita keteiik, konkýrsta 14 kezeń bar. Bul týraly Tengrinews.kz tilshisine ánshiniń dosy ári menedjeri Almapys Sharimov habarlady.
22 jastaǵy ánshi SOS d'un terrien en détresse ánin frantsýz tilinde oryndady. Dimash qatysýshylardyń ishinde eń jasy. Ony konkýrsqa uiymdastyrýshylar shaqyrypty.
Sharimovtyń aitýynsha, Qudaibergenov jaily kóptegen jergilikti basylymdar maqala jariialaǵan. Al qytailyq jankúierler Jelide "Qytai qazaqtarǵa tańǵalyp jatyr" delingen memderdi taratyp jatyr eken.
Konkýrs Qytaidyń Chansha qalasynda ótip jatyr. Menedjeriniń aitýynsha, Dimash Qudaibergenov osy konkýrsqa qatysý úshin imidjin ózgertipti. "Dimashtyń imidjin ózgerttik. Osyndai "lýk". Bul The voice emes, bul ataqty ári óner jolyna aiaq basqan ánshilerdiń konkýrsy", - degen edi munyń aldynda Sharimov. Aitýynsha, I Am a Singer konkýrsynyń besinshi maýsymy qytaidyń reitingi eń joǵary Hunan TV telearnasynda taratylady.
Sonymen qatar, ánshiniń ózi telearnanyń posterin de jariialady. "Qyran búrkit, kieli dombyra, tulpar, qasietti Allanyń úii, ulttyq oiý - Hýnan tv arnasy osylaisha meniń bolmysym, tynys-tirshiligimdi myna posterde beinelegen eken!", - dep jazdy ánshi Instagram jelisindegi papaqshasynda.
Aita keteiik, osyǵan deiin Dimash Qudaibergenov bul shoý jaiynda aityp bergen bolatyn. "Keshe Qytai telearnalary bas qosqan media konferentsiiada suraqtarǵa jaýap berdim. Ár jýrnalisttiń kókeiinde "Qazaqstannan qalai keldiń? Sen kimsiń? Qazaq qalai án aitady?" tektes suraqtar tolyp turdy... #TheSinger jobasynyń biyl besinshi maýsymy. Ótken maýsymda Oskar marapat júldesinde óner kórsetip, shyǵys pen batysty ánimen bailanystyryp júrgen Koko Li jeńiske jetti. Qarsylastarym da biylǵy osal emes. "China music world", "MTV awards" t.b myqty marapattardyń birneshe dúrkin jeńimpazdary, tájiribeli ánshiler.
Bul baiqaýdyń ereksheligi - tek saxnada án aityp qana qoimai, ómirlik jaǵdaiyn únemi kamera baqylaýynda. Joǵarydaǵy suraqtardyń jaýaby rasymen de ár jýrnalisttiń kókeiinde júrgen shyǵar. Erteń 21 qańtar kúni efirdi keshkilik Hýnan Tv arnasynan tamashalai alasyzdar. Otandastarym úshin ekinshi kúni YouTube videoportalyna tolyq nusqasy jariia bolady. Úlken serialdyń bul tek birinshi bólimi. Qalai ótetini, aspan asty eliniń meni qalai qabyldaityny áli de ózime jumbaq! Efirden keiingi oilaryńyzdy bilýge asyqpyn!", - dep jazǵan edi ol Instagram jelisindegi jazbasynda.
Ýikipediia málimeti boiynsha, I Am a Singer mýzykalyq konkýrsy koreidiń tanymal realiti-shoýynyń qytailyq nusqasy. Oǵan jeti tanymal mýzykant qatysady, olardyń árqaisysy álemdik júlde alǵan. Ár aptada bir qatysýshy shyǵyp qalyp, ornyna jańa oryndaýshy qosylyp otyrady. Jeńimpazdy aýditoriia tańdaidy.
Dimash Qudaibergenov Vitebskide ótken "Slavian bazary 2015" konkýrsynyń bas júldesin alǵan. Qańtar aiynyń basynda ol QR Tuńǵysh Prezidenti - Elbasynyń mádeniet salasyndaǵy memlekettik stipendiiasynyń iegeri atanǵan.
