Foto: Dimashnews.com
Álemge áigili qazaqstandyq ánshi Dimash Qudaibergen Niý-Iorktegi ataqty Madison Square Garden sahnasynda jeke kontsert ótkizdi. Bul — TMD elderiniń ishinde osy sahnada jeke kontsert qoiǵan tuńǵysh ánshi, dep habarlaidy Ult.kz QAZAQSTAN arnasyna silteme jasap.
20 myń kórermenge arnalǵan arenany jankúierler lyq toltyrdy. Keshke AQSh-pen qatar, Eýropa, Aziia jáne Latyn Amerikasynan kelgen tyńdarmandar qatysty. Dimashtyń ónerin kórýge asyqqan kórermender onyń sahnaǵa shyǵýyn uzaq kútkenderin aitty.
Kontsert barysynda Dimash qazaqtyń rýhyn tanytqan erekshe baǵdarlamasyn usyndy. Kórermender ánshimen birge Qazaqstannyń Ánuranyn oryndap, dombyra únimen kómkerilgen halyq ánderine súisine qol soqty. Ásirese «Taý ishinde» áni zaldy erekshe áserge bóledi. Sondai-aq Dimash tyńdarmanǵa jańa týyndysyn da tanystyrdy.
Dimash Qudaibergen:
«Men – Aqtóbede týǵan qarapaiym qazaq balasymyn. Búgin álemdegi eń ataqty Madison Square Garden sahnasynda qazaq tilinde án aityp, óz mádenietimizdi dáriptep turmyn. Buǵan kezinde ózim de senbes edim. Bul — sizderdiń duǵalaryńyz ben qoldaýlaryńyzdyń arqasy. Barlyqtaryńyzǵa myń alǵys!»
Kesh úsh saǵatqa sozyldy. Kórermenderdiń aitýynsha, ýaqyt qalai ótkenin baiqamai qalǵan.
«Dimash sahnada baryn saldy. Onyń daýysy men energiiasy tańǵaldyrady. Biz Milýokiden arnaiy keldik, kelesi kontsertin de jibermeimiz!» — dedi tyńdarman Erik.
«Ol oryndaǵan árbir ánniń óz syry bar. Tipti biz de qazaqsha án aityp kettik!» — dep qosty Djonatan esimdi kórermen.
Osylaisha Dimashtyń álemdik gastroldik týry AQSh-ta bastaldy. Eki kúnnen keiin ol Meksikada, al odan soń Ispaniia, Ulybritaniia, Germaniia jáne Latviiada óner kórsetpek.
