«Kazakh Tourism» ulttyq kompaniiasy» AQ basqarma tóraǵasynyń orynbasary Timýr Dúisenǵaliev ánshi Dimash Qudaibergenniń jetistigi Qazaqstannyń týrizmin qalai kóterip jatqanyn aityp berdi, dep habarlaidy QazAqparat tilshisi.
«Dimash Qudaibergen qazirdiń ózinde Qazaqstan týrizminiń elshisine ainaldy. Ótken jyly elimizde óte sátti «Dimash-týr» sharasy ótkizilgen edi. Biz álemdegi Dimashtyń eń belsendi fan-klýbtarynyń ókilderin shaqyrdyq. Týr shartty túrde - «Dimash týr» jáne «AAA» dep ataldy. AAA degenimiz - Aqtóbe, Astana jáne Almaty. Bul shara óte aýqymdy qyzyǵýshylyq týdyrdy. Qudaiǵa shúkir, Dimash shyńǵa shyǵyp keledi. Onyń saǵat saiyn álemde abyroiy artyp kele jatqany qýantady. Dimashqa ǵashyq adamdar kóp. Iaǵni, Dimash ózine ǵana emes, óziniń Otany Qazaqstanǵa degen qurmetti týǵyzady», - dedi «Spýtnik Qazaqstan» baspasóz ortalyǵynda ótken brifing barysynda «Qazaq týrizm» Ulttyq kompaniiasy tóraǵasynyń orynbasary Timýr Dúisenǵaliev.
Aita keteiik, brifingte Nur-Sultanda «Qazaqstan arýy» ulttyq baiqaýynyń finaly ótetini de habarlanǵan bolatyn.
Baiqaý 2 mamyrda elordadaǵy Nomad-holda ótkizilmek. Biylǵy «Qazaqstan arýy» ulttyq baiqaýynyń arnaiy jobasy boiynsha QR Mádeniet jáne sport ministrliginiń qoldaýymen tanymdyq rolikter jiyntyǵy jasalady. Bul kórkem, qysqa filmderde óńirlik týrdyń jeńimpazdary óz óńiriniń týristik múmkindikterin kórsetedi. Mysaly, «Óskemen arýy» biregei Rahman qainary týraly, «Aqtóbe arýy» «Úitas» tabiǵi eskertkishi jaily, «Shymkent arýy» «Aq meshit» úńgiri týraly áńgimelep beredi.
Qyzdar óziniń týǵan óńirleriniń kórnekti jerlerin bar meiirimmen ári maqtanyshpen tanystyrady, erekshe tabiǵi jáne arheologiialyq nysandardy óz kózderimen kórip, tamashalaý úshin saiahatshylardy ózderiniń týǵan óńirlerine shaqyrady.
«Qazaqstan arýy - 2019» ulttyq baiqaýy - imidjdik sharalardyń biri bolǵaly tur. «Qazaq týrizm» - ulttyq brend-menedjer retinde elimizde ótip jatqan aýqymdy sharalardy úilestirip, týrizmge paidaly bolýyn oilastyrady. Máselen, elordada jyl saiyn ótkiziletin Astana ekonomikalyq forýmy, álbette, aiasy men keletin yqpaldy adamdary turǵysynan óte aýqymdy shara. Ol yqpaldy adamdardyń sózderi álemniń úzdik ondaǵan telearnalarynda beriledi. Biraq, ókinishke orai, AEF-te jahandyq máseleler kóterilgenimen, Qazaqstandy týristik turǵyda jarnamalaý joq. Biz endigi kezekte árbir osyndai sharany qaita formattap, óz kontentimizdi kórsetip, Qazaqstannyń kórikti jerlerin bir kórsetip qalýǵa tyrysatyn bolamyz», - dedi Timýr Dúisenǵaliev.
Jańa format aiasynda «Dúniejúzi arýy» jáne «Álem arýy» siiaqty iri álemdik baiqaýlarǵa arnalǵan tanystyrylym rolikteri túsiriledi. Bul rette rolikter Uly dalanyń kieli jerlerine, Qazaqstan Respýblikasynyń biregei geografiialyq jáne tabiǵi landshafttaryna arnalmaq. Ulttyq kompaniia osy halyqaralyq jobalardaǵy media alańdardyń joǵary reitingisi arqyly yqtimal týristerdiń barynsha aýqymdy aýditoriiasyn tartýdy kózdeidi.
