Búgin Parlamenttiń bir top depýtattary senbilikke shyqty. Halyq qalaýlylary Astananyń «VIP-aimaǵy» - EKSPO-2017 kórmesiniń dál janynda (Uly Dala men Máńgilik el kósheleriniń qiylysynda) aǵash ekti, dep habarlaidy QazAqparat tilshisi.
Tańǵy saǵat 9:00-de jinalǵan depýttar úshin shyrsha, qaraǵai, aiýbadam (býzina), jide, mamyrgúl, tipti emen aǵashyn da daiyndap qoidy. Jer aldyn ala tyrmalanyp, aǵashty otyrǵyzatyn shuńqyrlar da qazyldy. Sondyqtan depýtattar úshin tek kúrek alyp, aǵashtardy otyrǵyzý ǵana qalǵan edi. Sol jerde júrgen jumysshylar topyraqty da zeńbilmen jetkizip turdy. Halyq qalaýlylary bolsa, aǵash otyrǵyzyp qana qoimai, beiresmi turǵyda áńgimelesip, ózara qaljyńdasyp, buqaralyq aqparat quraldaryna suhbat berip te úlgerdi.
«Biz joldyń boiynda qorshaǵan ortanyń jaǵymsyz faktorlaryna tózimdi aǵash túrlerin otyrǵyzyp jatyrmyz. Ondai aǵashtar uzaq ýaqyt boiy sýsyz tura alady. Baiqap qarasańyz, bul jerde kólikter kóp júredi, shań-tozań bar. Sol sebepti tózimdi aǵash pen butalardy otyrǵyzýǵa tyrysamyz», - deidi Parlament Májilisiniń tóraǵasy Nurlan Nyǵmatýlin. Osy joly spiker foto men video obektivterge ózi túsip qana qoimai, jýrnalisterdiń bireýin shaqyryp, otyrǵyzǵan aǵashyn birge sýardy.
Al áiel depýtattar bólek toptasyp júrdi.
Óz aǵashtaryn otyrǵyzyp, fotoǵa túsip júrdi. «1999 jyly Astanaǵa kelgeli beri birde-bir senbilikten qalǵan emespin. Bir rette qyzmettik is-saparmen ketip qalǵanda qatty alańdadym, mensiz senbilik ótpeitin siiaqty. Mine, búgin kezekti ret shyǵyp, aǵash egip otyrmyz. Osy kóshedegi aǵashtardyń barlyǵyn memlekettik qyzmetkerler otyrǵyzdy deýge bolady», - deidi depýtat Maira Aisina. Onyń aitýynsha, senbiliktiń basty artyqshylyǵy - kúndelikti jumysty bir sátke umytyp, ujymdy basqa qyrynan tanýǵa múmkindik bar.
Aita keteiik, búgingi senbilikke Senat men Májilis depýtattarynan bólek, Prezident Ákimshiligi, Premer-Ministr keńsesi, «Nur Otan» partiiasynyń ortalyq apparaty jáne basqa da birqatar memlekettik organdardyń qyzmetkerleri qatysty. Al aǵashtar Astananyń irgesindegi baqtan jetkizildi.
.jpeg)