Parlament Májilisiniń birqatar depýtattary onlain nesie berýdegi alaiaqtyq áreketterdiń kóbeiýine alańdaýshylyq bildirdi. Osyǵan bailanysty bir top depýtat QR Qarjy naryǵyn retteý jáne damytý agenttiginiń tóraǵasy Mádina Ábilqasymovaǵa saýal joldady, dep habarlaidy "Ult aqparat".
«Sońǵy jyldary elimizde halyqqa shaǵyn nesie berýmen bailanysty alaiaqtyq jaǵdailary jiilep ketti, alaiaqtar azamattarǵa olardyń qatysýynsyz onlain nesieler rásimdeýde. Bul másele boiynsha depýtattarǵa alaiaqtardyń isine tap bolǵan azamattar jii shaǵym túsirýde. Alaiaqtar azamattardyń jeke derekterin paidalanyp, onlain nesieni ózge adamǵa zańsyz rásimdeidi. Al, eń soraqysy zardap shekkender olarǵa rásimdelgen nesie týraly belgili bir ýaqyttan keiin ǵana, iaǵni kollektorlyq agenttikter mazalai bastaǵan kezde biledi», - dedi depýtat Elnur Beisenbaev Májilistiń jalpy otyrysynda.
Ishki ister organdarynyń resmi aqparaty boiynsha, 2019 jyly internet alaiaqtyqpen bailanysty 7 732 qylmys tirkelse, al 2020 jyly mundai faktilerdiń sany eki esege artyp 14 110 qylmysqa jetken.
2020 jyly mikrokredittik uiymdardyń internet-saittar arqyly onlain nesieler rásimdeýi boiynsha 3 myń quqyqbuzýshylyq jasalǵan. Sondai-aq, internet arqyly kez kelgen azamattyń jeke kabinetine qosylyp, olardyń plastikalyq kartalaryndaǵy shottarynan aqsha urlaý boiynsha 2,2 myńnan astam alaiaqtyq qylmys tirkelgen.
«Bul máseleniń kúrdeli ekenine dálel retinde keshe ǵana Soltústik Qazaqstan oblysynda er adam alaiaqtyq jolmen ózge azamattarǵa 50 nesie rásimdegen. Ol alaiaqtyǵyn iske asyrý úshin ózge azamattardyń joǵalǵan jeke kýálikterin paidalanǵan. Joǵarydaǵy kórsetilgen naqty mysal mikroqarjylyq uiymdardyń onlain qaryz berýdegi jeke tulǵany sáikestendirý rásimderin retteý júieleriniń tolyq pysyqtalmaǵanyn kórsetip tur. Osyǵan bailanysty japa shekken azamattar óziniń kinásiz ekenin moiyndatyp, zańsyz nesieni óshirý úshin 9 aiǵa deiin sottasýǵa májbúr. Bul óz kezeginde jábirlenýshiniń nesielik tarihyna ziian keltirip, qolma qol aqshasyz tólem jasaýyna kedergi tigizedi», - dedi depýtat.
Depýtat agenttikke klienttiń sáikestendirýin anyqtaýdy kúsheitý bóliginde mikrokredittik uiymdardyń onlain nesieler berý rásimderin qysqa merzimde qaita qaraýdy usyndy.
«Birinshiden, klienttiń biometriialyq erekshelikterin sáikestendirý protsedýralaryn kúsheitýdi qarastyrý qajet. Naqty ýaqyt rejiminde keskindi tekserý jáne rastaý, iaǵni alaiaqtardyń buryn daiyndalǵan beine nemese foto materialdardy qoldanýy múmkindigine jol bermeý. Ekinshiden, aqparattyq-baǵdarlamalyq júielerdi paidalaný arqyly onlain-kreditterdi rásimdeý kezinde eki satyly aýtentifikatsiiany engizýdi kózdeý kerek», - dedi E. Beisembaev.
