Qazaqstan Respýblikasy Quryltaiynyń depýtaty, «Ádilet» partiiasy fraktsiiasynyń múshesi Konstantin Avershin salyq rejiminiń ózgerýinen keiin shaǵyn jáne orta biznes sýbektileriniń edáýir qysqarǵanyn aitty. Ol bul týraly 23 qyrgúiekte ótken Quryltai otyrysynda málimdedi, dep habarlaidy ult.kz.
Onyń aitýynsha, Ulttyq statistika biýrosynyń derekterine sáikes, 2026 jylǵy 1 qańtarda Qazaqstanda 2 175 605 jumys istep turǵan ShOB sýbektisi bolǵan. Al 1 shildedegi jaǵdai boiynsha olardyń sany 1 974 899-ǵa deiin tómendegen.
«Osylaisha, alty ai ishinde statistikalyq turǵydan jumys istep turǵan ShOB sýbektileriniń sany 200 706-ǵa qysqardy. Tek Almatynyń ózinde tómendeý 41 252 sýbektini qurady», – dedi Konstantin Avershin.
Depýtat bul kórsetkishtiń tómendeýin Ulttyq statistika biýrosy jeke kásipkerlik sýbektileriniń 2026 jylǵy 1 qańtardan bastap engizilgen ózin-ózi jumyspen qamtyǵandarǵa arnalǵan arnaýly salyq rejimine ótýimen túsindirip otyrǵanyn atap ótti.
Sonymen qatar salyq organdarynyń derekterine sáikes, 2026 jyldyń birinshi toqsanynda 207 912 jeke kásipker qyzmetin toqtatqan. 2025 jyldyń osy kezeńinde bul kór setkish 82 874, al 2024 jyly 125 093 bolǵan.
«Osylaisha, bolyp jatqan protsesterdi tek kásipkerlerdiń salyq mártebesiniń tehnikalyq ózgerýimen bailanystyrýǵa bolmaidy. Statistikanyń artynda naqty kásiporyndar, jumys oryndary, azamattardyń tabystary, salyq bazasy jáne óńirler ekonomikasynyń turaqtylyǵy tur», – dedi ol.
Konstantin Avershinniń aitýynsha, shaǵyn jáne orta bizneske salyq reformasynyń naqty áserine obektivti baǵa berý qajet.
«Sondyqtan biznestiń jańa jaǵdailarǵa beiimdelýin jalpy sipattaýmen shektelmei, salyq reformasynyń naqty saldaryna obektivti baǵa berý jáne kásipkerlerge shamadan tys salmaq túsiretin sheshimderdi ýaqtyly túzetýge memlekettiń daiyndyǵyn baǵalaý qajet», – dedi depýtat.
Osyǵan bailanysty «Ádilet» partiiasy fraktsiiasy jeke kásipkerlerdiń qyzmetin toqtatýynyń naqty sebepterin anyqtaýdy usyndy. Atap aitqanda, naqty kásipkerlik qyzmetin toqtatqan, ózin-ózi jumyspen qamtyǵandarǵa arnalǵan arnaýly salyq rejimine ótken jáne jańa salyq talaptaryna bailanysty jumysyn jalǵastyra almaǵan kásipkerlerdiń sanyn bólek kórsetý qajet.
Sondai-aq depýtattar jańa salyq jaǵdailarynyń jumyspen qamtýǵa, ShOB sýbektileriniń ainalymyna, salyq túsimderine jáne kásipkerlik qyzmettiń beiresmi sektorǵa aýysýyna áserin baǵalaýdy surady.
Fraktsiia Úkimetten taldaý nátijeleri boiynsha salyq zańnamasy men quqyq qoldaný praktikasyna qajetti túzetýler engizý jóninde naqty usynystar ázirleýdi surady.
