Qazaqstanda mektep biologiiasyn oqytý sapasy tómendep barady. Osyǵan bailanysty «Qazaqstan halyq partiiasy» fraktsiiasynyń depýtaty Irina Smirnova Mádeniet jáne aqparat ministri Aida Balaevanyń atyna saýal joldady, dep habarlaidy ult.kz.
Depýtattyń aitýynsha, sońǵy jyldary mektepterde «Biologiia» páni óziniń mańyzyn joǵaltyp, oqýshylardyń pánge degen qyzyǵýshylyǵy azaiǵan. Sonyń saldarynan túlekterdiń jaratylystaný saýattylyǵy da tómendep keledi.
Foto: Depýtat Irina Smirnovanyń baspasóz qyzmeti
Saýalda biologiia pániniń adam densaýlyǵy, ekologiia, reprodýktivti saýattylyq jáne ǵylymi oilaý júiesin qalyptastyrýdaǵy róli erekshe ekeni atap ótilgen. Depýtat biologiia sabaqtarynda oqýshylar adam aǵzasynyń qurylysy, aýrýlardyń aldyn alý, vaktsinatsiianyń mańyzy, durys tamaqtaný men salaýatty ómir salty týraly bilim alýy tiis ekenin aitty.
Alaida qazirgi mektep baǵdarlamasynda birqatar másele bar.
"Biologiia pánine bólinetin saǵat sanynyń qysqarýy. Oqýlyqtardyń teoriialyq, sipattamalyq baǵytqa tym beiim bolýy jáne zerthanalyq ári praktikalyq jumystardyń jetispeýi. Biologiiany oqytýda tutas júieli tásildiń bolmaýy. Muǵalimderge sezimtal taqyryptardy (jynystyq tárbie, psihikalyq densaýlyq, AITV/JITS) talqylaýǵa arnalǵan ádistemelik qoldaýdyń tómen deńgeii. Sonyń saldarynan bul máseleler ne múlde nazardan tys qalady, ne formaldy túrde ǵana túsindiriledi. UBT tapsyrmalarynyń kúrdeliligi oqýshylardyń pándi naqty túsiný deńgeiine sáikes kelmeýi. Bul tereń bilim alýǵa emes, test jattaýǵa itermeleidi", - deidi depýtat.
Osyǵan bailanysty halyq qalaýlysy birneshe usynys jasady. Ol 6-synyptan bastap biologiiany bólimder boiynsha júieli oqytýdy usyndy: 6-synypta – botanika, 7-synypta – zoologiia, 8-synypta – anatomiia, al 9–11-synyptarda jalpy biologiiany tereńdetip oqytý qajet dep sanaidy.
Sondai-aq depýtat oqýlyqtardy jańartyp, genetika, neirobiologiia, ekologiia jáne reprodýktivti densaýlyq taqyryptaryn kúsheitýdi, 7–9-synyptarǵa jynystyq tárbie men salaýatty ómir salty boiynsha mindetti sabaqtar engizýdi usyndy.
Budan bólek, biologiia muǵalimderin qaita daiarlaý, mektep kabinetterin mikroskoptarmen jáne tsifrlyq zerthanalarmen jabdyqtaý, sondai-aq qorytyndy emtihandardy test formatynan aýyzsha jáne praktikalyq formatqa aýystyrý máselesi kóterildi.
Depýtattar bul sharalar oqýshylardyń jaratylystaný saýattylyǵyn arttyryp, jastardyń óz densaýlyǵy men qorshaǵan ortaǵa jaýapkershilikpen qaraýyna yqpal etedi dep esepteidi.
