Búgin Parlament Májilisiniń jalpy otyrysynda depýtat Ǵalymjan Eleýov dárilik qamtamasyz etýge qatysty másele kóterip, Densaýlyq saqtaý ministriniń atyna depýtattyq saýal joldady, dep habarlaidy "Ult aqparat".
«Ómirleri úshin asa mańyzdy preparattardyń ýaqytynda jetkizilmegenine bailanysty aýyr diagnozdary bar adamdardyń sansyz shaǵymdary men aryzdary túsip jatyr. Sáýir aiynyń ortasy bolǵanymen, alaida tizimdegi dárilik zattardyń 70-ke jýyq pozitsiiasy boiynsha preparat satyp alynbaǵan. Sonymen birge osy 70 tarmaqtan basqa, satyp alyndy dep kórsetilgen 45 pozitsiia boiynsha alǵashqy jetkizilý merzimi sáýir aiynan bastalady, al keibireýler tipti 2021 jyldyń qazan aiynan bastap jetkiziledi eken», - dedi depýtat.
Onyń aitýynsha, 2021 jylǵa arnalǵan Biryńǵai distribiýtordan satyp alynatyn dárilik zattardyń, meditsinalyq buiymdardyń tizimi Densaýlyq saqtaý ministrliginiń buiryǵymen 2020 jyldyń 28 shildesinde bekitilgen.
«Iaǵni, 2021 jyldyń bastalýyna deiin halyqty tegin dárilik zattarmen qamtamasyz etý boiynsha mindet aldyn ala belgilendi. Osyǵan qaramastan meniń resmi saýaldaryma SK-Farmatsiia aqparaty boiynsha onkologiialyq naýqastar úshin L-asparaginaza, Vinblastin, Denozýmab, Metotreksat, Tsiklofosfamid sekildi isikke qarsy preparattar satyp alynbaǵan», - dedi ol.
Ǵalymjan Eleýovtiń sózine qaraǵanda, «Tamoksifen» de kesh ákelindi.
Budan bólek, «Anastrazol» jáne «Interferon alfa», «onko-BTsJ» tolyq emes kólemde jetkizildi.
«Qazirgi kezde onkologiialyq aýrýhanalardyń esebinde 180 myńnan astam azamat tirkelgen. Ókinishke qarai, jyl saiyn elimizde olardyń qatary 30 myń adamǵa kóbeiýde. Bul naýqastarǵa arnalǵan dárilerdiń tipti 10 kúnge keshigip jetkizilýi aýyr jaǵdaiǵa alyp kelýi múmkin», - dedi depýtat.
Munymen qosa ol týberkýlezge shaldyqqan naýqastarǵa arnalǵan preparattar da ýaqytynda jetkizilmegenin atap ótti.
