Áleýmettik jelilerde tarihi taqyryptaǵy kúmándi jáne burmalanǵan aqparat tez taralady. Oǵan der kezinde kásibi jaýap berip, naqty derek usynatyn júieli tetik qajet, dep esepteidi «Ádilet» Fraktsiiasynyń depýtaty Sholpan Karinova. Ol bul týraly Quryltai otyrysynda aitty, dep habarlaidy ult.kz.
Onyń aitýynsha búginde tarihi sana tek oqýlyq pen ǵylymi eńbekter arqyly qalyptaspaidy. Áleýmettik jeli men tsifrlyq platformanyń yqpaly artyp keledi. Ásirese jastar TikTok, Instagram, YouTube siiaqty platformalardan aqparatty kóp alady. Sondyqtan Qazaqstan tarihy týraly qandai aqparat taraidy, onyń derekkózi qandai jáne ol qoǵamǵa qalai jetkiziledi degen suraqtyń mańyzy artyp keledi.
"Halyqpen kezdesýler kezinde elde atqarylyp jatqan kóptegen mańyzdy jumystardy azamattardyń tolyq bile bermeitinine kóz jetkizdik.
Másele jumystyń joqtyǵynda emes. Másele – onyń máni men nátijesin halyqqa túsinikti tilde jetkizýde.
Sondyqtan aqparatty jai jariialaý jetkiliksiz. Ony túsindirý de mańyzdy. Azamatqa reformanyń maqsatyn, onyń nátijesin jáne qoǵamǵa áserin túsindiretin jýrnalistika qajet.
Memlekettik aqparattyq saiasat ta osy baǵytqa basymdyq berýi kerek. Ol tek memlekettik bastamalardy jariialaýmen shektelmeýi tiis.
Aqparattyq saiasat tarihi sanany qalyptastyrýǵa, ulttyq qundylyqty dáripteýge jáne eldegi ózgeristi durys túsindirýge qyzmet etýi qajet.
Bul ásirese jastar úshin mańyzdy. Óitkeni búgingi aqparat erteńgi qoǵamdyq kózqarasqa áser etedi", – dedi ol.
Osyǵan bailanysty depýtat Úkimetke kelesi saýaldardy joldady:
1. Ulttyq tarihi sanany memlekettik aqparattyq saiasattyń basym baǵytynyń biri retinde aiqyndaýdy;
2. Qazaqstan tarihyna qatysty kontenttiń ǵylymi negizdiligi men derektiligin qamtamasyz etetin júie qalyptastyrýdy;
3. Tarihi jad pen ulttyq qundylyqtardy dáripteitin zamanaýi media-jobalardy qoldaýdy;
4. TikTok, Instagram, YouTube siiaqty platformalarda Qazaqstan tarihyn zamanaýi ári túsinikti formatta nasihattaityn jobalardy iske asyrýdy;
5. Tarihqa qatysty jalǵan jáne burmalanǵan aqparatqa jedel jaýap beretin tiimdi tetik qalyptastyrýdy suraimyz.
