Qazaqstandaǵy Dúniejúzilik densaýlyq saqtaý uiymy keńsesiniń basshysy Oleg Chestnov postkeńestik elderdegi alkogolmen kúres máselesi týraly oiyn bildirdi, dep habarlaidy QazAqparat tilshisi.
«Postkeńestik elderde alkogoldy tutyný deńgeii joǵary. Óitkeni adamdar retimen ishýdi bilmeidi. Temekige salynǵandai, meniń oiymsha, ishimdikke tyiym salynbaidy. «Qurǵaq zańnyń» kómektese almaityny belgili. Sebebi, ishimdik kei adamdardyń daǵdysyna ainalyp ketkeni ótirik emes. Dárigerler «ishpe, jeme, temeki tartpa» deidi. Al halyq arasynda osydan keiin dárigerlerdi tyiymy men keńesine «allergiia» paida bolady. Al biz «jeseńizder jeńizder, tek shama eskerilse» deimiz. Maily tamaq jegińiz kele me - kóp emes, azdan tutynyńyz. Palma maiynan qashyqtaý júrgen abzal. Al kópshilik negizinen bizdiń aǵzany alkogol qurtatynyn bile bermeidi. Mine, sondyqtan, alkogoldy durys tutyna bilý - paiymdy ári kompromisti ustanym», - dedi spiker Astanada ótken jiynda.
Sarapshynyń aitýynsha, bul rette gradýsy joǵary sýsyndardan baiqaý kerek.
«Eń aldymen, halyqpen jumys isteý kerek. Álbette, tyiym da bolýy tiis. Adamdar ishimdikti tyǵyryqtan shyǵar jol retinde kórmeýi kerek. Mysaly, biz jańa jylda ústelge shampan qoiamyz ǵoi. Bireý osylai sabyr saqtasa, ekinshisi mereke bastalmai turyp, bir bótelkeni kóterip úlgeredi. Bir densaýlyǵymyzǵa barlyq júkti arta almaimyz. Sondyqtan, árbir adamnyń ishimdikti tutynýda óz saiasaty bolýy kerek», - dedi Oleg Chestnov.
Buǵan mysal retinde Oleg Chestnov Aliaska men Chýkotkany keltirdi.
«Aliaskany alyp qaraiyq. Resei jaqtaǵy Chýkotkada kóp aýyldyń turǵyndary iship ketken. Al Aliaskaǵa barsańyz, jergilikti bilik alkogolǵa qatysty saýatty saiasat júrgizip otyr. Ol jerde ishimdikten basqa barda kesh ótkizý, tennis kortynda saiys uiymdastyrý sekildi balama qyzyqtar jeterlik. Adamdarda tańdaý bolýy tiis: ol ishkisi kele me, álde balalarmen sport zalyna barýdy jón kóre me? DDSU bul rette elderge kómektesýge daiyn», - deidi ol.
Oleg Chestnovtyń aitýynsha, QR Densaýlyq saqtaý ministrligi bul baǵyttaǵy jumysqa atsalysqaly otyr.
«Biz turaqty túrde kezdesetin ministr Eljan Birtanov alkogoldyń aldyn alýǵa bailanysty qarjy bólinetinin aitty. Aldyn alý jumystaryn júrgizý úshin aǵartý jumysyn kúsheitý kerek. Ol jumys mektepten bastalýy tiis. Bir jaqsysy, QR Densaýlyq saqtaý ministrligi bul jumysqa aralasyp qana qoimai, kóp iste bastamashy da bolyp otyr», - deidi Oleg Chestnov.
