Almatyda Olimpiada júldegeri, sportshy Denis Tenniń atyndaǵy shákirtaqy taǵaiyndaldy. Qazaqstan Britan tehnikalyq ýniversitetiniń rektoraty bul qarjylai kómekti sporttan da, bilimnen de úzdik shyqqan úsh stýdentke beretin bolady, – dep habarlaidy QazAqparat.
Aita ketý kerek, sportshy osy oqý ornynyń magistratýrasynda bilim alǵan bolatyn. Saltanatty sharaǵa sportshynyń anasy Oksana Ten shaqyryldy.
«Oqý ornynyń basshylyǵy óz kúshterimen talantty jastardy qoldaý úshin ataýly shákirtaqy berip jatqany kóńil qýantady. Denistiń de armany sol edi. Bul sharalar el jastarynyń sport, bilim salasynda damýyna, jastardyń boiyndaǵy patriottyq sezimdi oiatýǵa yqpalyn tigizeri sózsiz. Biz óz kezegimizde Qazaqstanda mánerlep syrǵanaý óneriniń damýyna barynsha úles qosyp jatyrmyz. Jaqynda I Halyqaralyq týrnir ótkizdik» dedi anasy.
Al oqý ornynyń rektory Kenjebek Ibrashev shákirtaqyny ielenýge 80 stýdent ótinim bergenin habarlady. Arnaiy komissiia olardyń arasynan úzdik 3 stýdentti tańdap aldy.
«Denis Ten QBTÝ Executive MBA Biznes mektebiniń magistranty bolatyn. Ol sporttaǵy eren jetistikterine qaramastan, oqýda da qyraǵylyq tanytyp, bizdiń stýdentterge jan-jaǵynan úlgi bola bildi. Sol úshin KBTÝ kinozalyna Denis Tenniń esimin berdik. Endowment qorynyń kómegimen Denistiń atyndaǵy shákirtaqy taǵaiyndaýdy sheshtik» dedi Kenjebek Ibrashev.
Aita ketý kerek, Ońtústik Koreianyń Seýl qalasynda 6-11 qarasha arasynda mánerlep syrǵanaýdan Olimpiada júldegeri Denis Tenniń shyǵarmashylyǵyna arnalǵan kórme ótti. Kórmede túrli halyqaralyq saiystarda túsirilgen fotosýretter, qysqametrajdy film kórsetildi.
