الماتىدا وليمپيادا جٷلدەگەرٸ, سپورتشى دەنيس تەننٸڭ اتىنداعى شەكٸرتاقى تاعايىندالدى. قازاقستان بريتان تەحنيكالىق ۋنيۆەرسيتەتٸنٸڭ رەكتوراتى بۇل قارجىلاي كٶمەكتٸ سپورتتان دا, بٸلٸمنەن دە ٷزدٸك شىققان ٷش ستۋدەنتكە بەرەتٸن بولادى, – دەپ حابارلايدى قازاقپارات.
ايتا كەتۋ كەرەك, سپورتشى وسى وقۋ ورنىنىڭ ماگيستراتۋراسىندا بٸلٸم العان بولاتىن. سالتاناتتى شاراعا سپورتشىنىڭ اناسى وكسانا تەن شاقىرىلدى.
«وقۋ ورنىنىڭ باسشىلىعى ٶز كٷشتەرٸمەن تالانتتى جاستاردى قولداۋ ٷشٸن اتاۋلى شەكٸرتاقى بەرٸپ جاتقانى كٶڭٸل قۋانتادى. دەنيستٸڭ دە ارمانى سول ەدٸ. بۇل شارالار ەل جاستارىنىڭ سپورت, بٸلٸم سالاسىندا دامۋىنا, جاستاردىڭ بويىنداعى پاتريوتتىق سەزٸمدٸ وياتۋعا ىقپالىن تيگٸزەرٸ سٶزسٸز. بٸز ٶز كەزەگٸمٸزدە قازاقستاندا مەنەرلەپ سىرعاناۋ ٶنەرٸنٸڭ دامۋىنا بارىنشا ٷلەس قوسىپ جاتىرمىز. جاقىندا ٸ حالىقارالىق تۋرنير ٶتكٸزدٸك» دەدٸ اناسى.
ال وقۋ ورنىنىڭ رەكتورى كەنجەبەك يبراشەۆ شەكٸرتاقىنى يەلەنۋگە 80 ستۋدەنت ٶتٸنٸم بەرگەنٸن حابارلادى. ارنايى كوميسسييا ولاردىڭ اراسىنان ٷزدٸك 3 ستۋدەنتتٸ تاڭداپ الدى.
«دەنيس تەن قبتۋ Executive MBA بيزنەس مەكتەبٸنٸڭ ماگيسترانتى بولاتىن. ول سپورتتاعى ەرەن جەتٸستٸكتەرٸنە قاراماستان, وقۋدا دا قىراعىلىق تانىتىپ, بٸزدٸڭ ستۋدەنتتەرگە جان-جاعىنان ٷلگٸ بولا بٸلدٸ. سول ٷشٸن كبتۋ كينوزالىنا دەنيس تەننٸڭ ەسٸمٸن بەردٸك. Endowment قورىنىڭ كٶمەگٸمەن دەنيستٸڭ اتىنداعى شەكٸرتاقى تاعايىنداۋدى شەشتٸك» دەدٸ كەنجەبەك يبراشەۆ.
ايتا كەتۋ كەرەك, وڭتٷستٸك كورەيانىڭ سەۋل قالاسىندا 6-11 قاراشا اراسىندا مەنەرلەپ سىرعاناۋدان وليمپيادا جٷلدەگەرٸ دەنيس تەننٸڭ شىعارماشىلىعىنا ارنالعان كٶرمە ٶتتٸ. كٶرمەدە تٷرلٸ حالىقارالىق سايىستاردا تٷسٸرٸلگەن فوتوسۋرەتتەر, قىسقامەتراجدى فيلم كٶرسەتٸلدٸ.
