AQSh kongresiniń ókilder palatasyndaǵy demokrattar 11 qańtarda prezident Donald Trampqa qarsy impichment baptaryn tanystyrýy múmkin. Bul aqparatty kongressmen Ted Liý sózine súiengen "Amerika daýysy" saity habarlady.
9 qańtar keshke kongrestiń 190-nan astam múshesi (barlyǵy da demokrat) prezidentke impichment jariialaýdy qoldaǵan. Impichment baptary qalai qurastyrylatyny belgisiz. Biraq prezidentke 6 qańtar kúngi Kapitoliige jasalǵan shabýyl boiynsha aiyptar taǵylýy múmkin. Tramp jaqtastarynyń shabýyly kezinde bir demonstrant pen bir politsei qaza bolǵan.
Demokrattar Vashingtondaǵy miting kezinde Tramp sailaý nátijesin moiyndamai, Kapitoliige barýǵa úndeý arqyly jaqtastaryn tártipsizdikke itermeledi dep sanaidy. Shtýrm kezinde Tramp shabýyldy aiyptamady, tek politseilerge kúsh qoldanbaýǵa shaqyrdy. Keiinirek jaqtastaryn sabyrǵa shaqyryp, basyp alýdy aiyptaǵan.
Trampqa 2019 jyldyń aiaǵynda da impichment jariialandy. Ol kezde prezident "ókiletin asyra paidalandy" dep aiyptaldy. Senatta kópshilik bolyp otyrǵan respýblikashyldar ony aqtap shyǵyp, izinshe Tramp ókiletin jalǵastyra bergen. Bir jyl ishinde prezidentke eki ret impichment jariialaý AQSh tarihynda buryn-sońdy bolmaǵan.
Tramp ókiletiniń aiaqtalýyna 10 kún qaldy. Sailaýda jeńgen Djo Baiden 20 qańtarda ókiletine kirisedi. Soǵan qaramastan ókilder palatasyndaǵy demokrattar kelesi aptada protsedýrany aiaqtaýdy kózdep otyr. Odan keiin is senatqa jiberilip, sotqa uqsas protsess taǵaiyndalady. Munyń bári 20 qańtarǵa deiin júzege asyp úlgermeýi de múmkin. Ondai jaǵdaida protsess Tramp ókileti aiaqtalǵannan keiin jalǵasady.
Tramp impichment jariialaý yqtimaldyǵyna bailanysty túsinikteme bermedi. Jetekshi áleýmettik jeliler 6 qańtar kúngi oqiǵadan keiin Tramptyń akkaýnttaryn buǵattap, keibirin joiǵan.
