Qytai Halyq Respýblikasynyń Hanchjoý qalasynda Aziianyń mádeni murasyn qorǵaý aliansy keńesiniń IV otyrysy ótti. Jiynǵa 20-dan astam memlekettiń mádeniet salasyna jaýapty vedomstvo basshylary, Mádeni qundylyqtardy saqtaý jáne qalpyna keltirý jónindegi halyqaralyq zertteý ortalyǵynyń (IKKROM) jáne Qaqtyǵys aimaqtaryndaǵy murany qorǵaý jónindegi halyqaralyq alianstyń (ALIPH) ókilderi qatysty. Qazaqstan atynan Mádeniet jáne aqparat vitse-ministri Aibek Sydyqov sóz sóiledi.
Vitse-ministr Qazaqstannyń IýNESKO-men ortaq jumysy týraly aityp, Alianspen yntymaqtastyqty úsh baǵytta damytýdy usyndy. Olar: mamandar daiarlaý jáne tájiribe almasý, tsifrlyq tehnologiialar men jasandy intellekt kómegimen eskertkishterdi qashyqtan baqylaý, sondai-aq Uly Jibek joly boiyndaǵy nysandarda birlesken arheologiialyq jáne ǵylymi zertteýler júrgizý.
Otyrys qorytyndysy boiynsha Qazaqstanǵa Alianstyń baqylaýshy memleketi mártebesi berildi. Vitse-ministr qoldaý bildirgen Keńes múshelerine alǵys aityp, bul mártebe Aziia elderimen ortaq mádeni murany saqtaý baǵytyndaǵy bailanysty keńeitýge múmkindik beretinin atap ótti.
Sapar barysynda Aibek Sydyqov Alianstyń atqarýshy bas hatshysy Se Binmen de kezdesti.
Taraptar aldaǵy jumystyń baǵyttaryn talqylady. Se Bin Qazaqstannyń Aliansqa qosylý týraly sheshimin joǵary baǵalady. Sondai-aq yntymaqtastyq odan ári nyǵaia túsip, aldaǵy ýaqytta Qazaqstannyń uiymǵa tolyqqandy múshe bolatynyna senim bildirdi. Ol Qytai men Qazaqstan arasyndaǵy airyqsha mádeni bailanys seriktestikti damytýǵa negiz bolatynyn atap ótti.
Qazaqstan delegatsiiasy IV Lianchjý forýmynyń ashylýyna da qatysty. Forýmǵa IýNESKO, IKKROM, ALIPH jáne Ibero-Amerika memleketteriniń bilim, ǵylym jáne mádeniet jónindegi uiymynyń ókilderi jinaldy.
Qazaqstan Aziianyń mádeni murasyn qorǵaý aliansynda baqylaýshy memleket mártebesine ie boldy
