Qytai ǵalymdary koronavirýs álem halqynyń úshten ekisine juǵýy múmkin dep boljaidy. Dúniejúzilik densaýlyq saqtaý uiymynyń keńesshisi Aira Londjini Bloomberg agenttigine bergen suhbatynda osylai dedi.
Qytaidaǵy virýstyń taralýyn zerttep júrgen Londjinidiń aitýynsha, árbir naýqas ortasha eseppen eki-úsh adamǵa infektsiia taratady. Keibir adamdarda koronavirýstyń belgileri asa qatty bilinbeidi, bul aýrýdy erterek anyqtaýdy qiyndatyp otyr.
Sarapshynyń pikirinshe, naýqastardy alshaqtap, karantinge jiberý koronavirýstyń taralýyna tosqaýyl bola almaidy. Alaida Qytai qoldanyp jatqan sharalar basqa memleketterge epidemiiaǵa daiyndalýǵa múmkindik beredi.
Sońǵy derek boiynsha, Qytaida virýsty juqtyrǵandar sany 64 myńǵa jýyqtady. Sońǵy táýlikte bes myńnan astam adamnan virýs tabylǵan. Jeltoqsan aiynan beri koronavirýstan 1380 adam kóz jumdy. Shamamen jeti myńǵa jýyǵy jazylyp ketti.
Qytaidan tys aýmaqta 500-den astam adam aýrýǵa shaldyqqan. Olardyń jartysy Japoniiada turady.
Ortalyq Aziia elderinde koronavirýs juqtyrǵandar joq. Qazaqstan aqpannyń basynan bastap, Qytaiǵa baratyn transporttyń barlyq túrin shektep, qytailyqtarǵa viza berýdi toqtatqan. Aqpannyń basynda Qazaqstan Ýhanda oqyp jatqan 80 stýdentin keri qaitardy. Keiin Qytaida júrgen Qazaqstannyń 8 azamaty Resei men Ózbekstannyń ushaqtarymen osy elge kelgen. 11 aqpanda Qazaqstan Qytaidan 217 azamatyn, 13 aqpanda 211 azamatyn evakýatsiialady.
Qazaqstan densaýlyq saqtaý ministrliginiń dereginshe, qazir Qytaidan kelgen 20 qazaqstandyq temperatýra jáne tumaýmen aýrýhanada jatyr.
13 aqpanda Japoniianyń Iokogama qalasynyń jaǵasynda koronavirýstan soń karantinge jabylǵan Diamond Princess krýizinde Qazaqstannyń tórt azamaty bar ekeni anyqtaldy.
