Dúniejúzilik densaýlyq saqtaý uiymynyń sarapshylary koronavirýstyń taraýyn zertteý úshin Qytaiǵa keldi. Qytailyq BAQ 10 adamnan quralǵan halyqaralyq sarapshylar tobynyń Ýhanǵa 14 qańtarda jetkenin habarlady. Olar 2019 jyldyń sońynda virýs oshaǵyna ainalǵan qalada bir aiǵa jýyq ýaqyt bolady.
AQSh, Avstraliia, Germaniia, Japoniia, Ulybritaniia, Resei, Niderland, Katar, Vetnam mamandary karantin jaǵdaiynda jumys isteidi. Qytai sarapshylarymen videomen bailanysqa shyǵyp, máseleni talqylap otyrady.
DDSU basshysy Tedros Gebreiesýs ótken aptada Qytaiǵa sapardyń shegerilgenine ókinish bildirgen. Uiym basshysy 5 qańtarda Qytai biligi ǵalymdardyń kirýine áli ruqsat bermedi dep málimdegen. Sonyń saldarynan keibir mamandar elderine qaitýǵa májbúr bolǵan. Gebreiesýs Qytai biligine sapardyń mańyzdylyǵyn anyq jetkizgenin atap ótken.
Onyń aitýynsha, ǵalymdar Qytaida koronavirýstyń adamǵa alǵash qalai juqqanyn anyqtaýǵa kúsh salady.
Buǵan deiin koronavirýstyń juǵý tásili jaily túrli boljam aitylǵan. Virýs Ýhandaǵy bazarda satylǵan janýarlar eti arqyly adamǵa juqty degen boljam da taraǵan.
Qytai syrtqy ister ministrliginiń resmi ókili Chjao Litszian 12 qańtarda taraptar arasynda kelissóz júrgennen keiin Pekin ǵalymdardyń kirýine ruqsat bergenin aitty. Ministrlik ǵalymdar saparyn "koronavirýs tegin anyqtaýdy kózdegen ǵylymi áriptestik negizinde Qytai ǵalymdary men meditsina mamandarymen pikir almasý" múmkindigi dep atady.
Litszian baspasóz jiyny kezinde virýstyń taraýyna kóptegen eldiń qatysy bolýy múmkin dep málimdedi."Epidemiologiialyq ahýal ózgergen saiyn virýs jaily bilimimiz tolyǵyp, erterek keister de anyqtalyp jatyr" dedi.
Qytai úkimeti indetti buzylǵan teńiz ónimderin importtaýmen bailanystyrýǵa beiim. Bul boljamdy halyqaralyq sarapshylar joqqa shyǵarǵan.
