Daiyn metall ónimderi Reseiden qymbat baǵamen importtalýda. Bul týraly QR IIDM Indýstriialyq damý komiteti tóraǵasynyń orynbasary Turar Jolmaǵambetov málim etti, dep habarlaidy QazAqparat.
«TMD elderi arasynda turǵyn úi qurylysy qarqyny boiynsha Qazaqstan kóshbasshylardyń qatarynda. Ol úshin qurylys materialdary aýqymdy kólemde kerek bolatyny túsinikti. Elimizdegi qurylys nysandaryna kerek armatýranyń jartysyn otandyq óndirister qamtamasyz etedi. Qalǵanyn birneshe elden, onyń ishinde eleýli kólemin Reseiden importaimyz. Osy oraida eksportqa ýaqytsha tyiym salý qadamy esebinen, otandyq óndiristerdi shikizatpen qamtamasyz etý múmkindigi bar», - Jolmaǵambetov Ortalyq kommýnikatsiialar qyzmetinde.
Onyń aitýynsha, metall qaldyqtarynyń shyǵarylýyn shektei otyryp, shikizatty óńdeý, ishki naryqty qajetti ónimmen qamtamasyz etý maqsaty qoiylyp otyr.
2021 jyly Qazaqstannan Reseige 124 mlrd teńgege 754 myń tonna qara metall synyqtary pen qaldyqtary shyǵaryldy. Bir tonnanyń ortasha baǵasy - 165 myń teńge. Biyl Reseiden Qazaqstanǵa 260 mlrd teńgege shamamen 700 myń tonna qurylys armatýrasy importtaldy. Bir tonnanyń ortasha baǵasy - 375 myń teńge. Sonymen qatar baǵasy tonnasyna 1 mln teńgege deiin jetetin shveller, qubyr men basqa da daiyn ónim importtalady.
«Ózimizdiń shikizatty barynsha kóbirek óńdep, odan daiyn ónimderdi shyǵarýymyz kerek. Osy oraida ishki naryqty qamtamasyz etý men daiyn zattardy eksportaýǵa múmkindik bolady», - dedi vedomstvo ókili.
