Memleket jáne qoǵam qairatkeri, tarih ǵylymdarynyń doktory, jazýshy Darhan Qydyráli Halyqaralyq «Alash» ádebi syilyǵymen marapattaldy, dep habarlaidy ult.kz.
Saltanatty marapattaý rásimi Qazaqstan Jazýshylar odaǵynyń ǵimaratynda ótti. Jiyn barysynda Qazaqstan Jazýshylar odaǵy Basqarmasynyń tóraǵasy Mereke Qulkenov Darhan Qydyráliniń ulttyq ádebiettaný ǵylymyn damytýǵa, túrki dúniesiniń ortaq rýhani murasyn zertteýge jáne qazaq mádenietin halyqaralyq deńgeide nasihattaýǵa qosqan úlesin joǵary baǵalady.
Onyń aitýynsha, Darhan Qydyráliniń Alash murasy, túrki órkenieti, qazaq ádebietiniń tarihy men rýhani sabaqtastyǵyna arnalǵan ǵylymi eńbekteri ádebiettaný men túrkologiia ǵylymynyń damýyna eleýli úles qosqan.
Jiynda aqyn, Qazaqstan Jazýshylar odaǵy Basqarmasy tóraǵasynyń orynbasary Qasymhan Begmanov, filologiia ǵylymdarynyń doktory Qanseiit Ábdezuly jáne aqyn, «Ana tili» gazetiniń bas redaktory Erlan Júnis sóz sóilep, Darhan Qydyráliniń «Egemen Qazaqstan» respýblikalyq gazetine jetekshilik etken kezeńdegi jáne memlekettik qyzmettegi eńbegine toqtaldy. Olar onyń ulttyq baspasózdiń damýyna, qoǵamdyq pikirdiń qalyptasýyna jáne eldiń rýhani ómirine qosqan úlesin atap ótti.
Óz kezeginde Darhan Qydyráli joǵary marapat úshin Qazaqstan Jazýshylar odaǵyna alǵys bildirip, sońǵy jyldary uiymda júzege asyrylyp jatqan jumystarǵa oń baǵasyn berdi. Ol Jazýshylar odaǵy ǵimaratynda júrgizilip jatqan kúrdeli jóndeý jumystary shyǵarmashylyq ortaǵa jańa serpin beretinin aitty.
Sondai-aq ol ádebiet salasy boiynsha Nobel syilyǵynyń laýreaty Mo Iannyń Qazaqstanǵa kelip, Jazýshylar odaǵynda oqyrmandarmen kezdesýi qazaq ádebietiniń halyqaralyq bedelin arttyrǵan mańyzdy oqiǵa bolǵanyn atap ótti.
Darhan Qydyráli sóz barysynda Qazaqstan Jazýshylar odaǵy men «Kitap oqityn ult – Chitaiýshaia natsiia» qoǵamdyq qory arasyndaǵy yntymaqtastyq týraly memorandýmǵa da toqtalyp, mundai bastamalar kitap oqý mádenietin damytýǵa, jastardyń ádebietke qyzyǵýshylyǵyn arttyrýǵa jáne zerdeli ult qalyptastyrýǵa yqpal etetinin aitty.
