Májilis depýtaty Darhan Myńbai keshe «Egemen Qazaqstan» gazetinde jariialanǵan Prezident Qasym-Jomart Toqaevtyń «Táýelsizdik bárinen qymbat» atty maqalasyna qatysty pikir bildirdi.
«Memleket basshysy Qasym-Jomart Toqaev «Táýelsizdik bárinen qymbat» atty maqalasynda azattyqtyń qadir-qasietin, ult tarihynyń mán-mańyzyn, qundylyqtar sabaqtastyǵynyń jai-japsaryn búgingi syn-qaterler aiasynda túsindiredi. Atqan tańdai aqiqat sol - tarih qashanda jas urpaq úshin qajet» deidi halyq qalaýlysy.
Onyń aitýynsha, Prezident máseleni jańa qyrynan qoiyp otyr.
«Ulttyq múddemizge sai keletin kóptomdyq jańa tarihymyz áli tolyq jazylǵan joq. Onyń tujyrymdamasyn buǵan deiingi olqylyqtardy eskere otyryp qaita qarap, jańa ǵylymi ustanymdar men jańalyqtardyń negizinde tyńnan jazatyn ýaqyt áldeqashan keldi» delingen maqalada. Bul - sabaqtastyq joly. Esterińizde bolsa, Elbasy Nursultan Nazarbaev naqty tarihi málimet beretin oqýlyq túzý týraly tiisti qurylymdarǵa tapsyrǵan bolatyn. Barlyq másele bilikti mamandarǵa kelip tireledi. Áitse de Elbasy ózi bastama kóterip, «Bolashaqqa baǵdar: rýhani jańǵyrý», «Uly dalanyń jeti qyry» atty tujyrymdamalyq tarihi maqalalar jazdy. Qasym-Jomart Toqaevtyń «Táýelsizdik bárinen qymbat» maqalasy - Táýelsizdiktiń 30 jyldyǵynyń qulaq kúii. Úlken tarihty baǵalaýdyń jańa platformasy. Jańashyl kontseptsiia. Ótken kún, qazirgi shaq, bolashaq arasyn jalǵaityn rýhani tanym arqaýy. Qazir Otan tarihyna jaýapty ǵylymi mekemeler, tiisti ministrlik, ýniversitetterdegi kafedralar men ǵylymi-zertteý ortalyqtar bar. Qanshama ýaqyt ishinde memlekettik mańyzy bar tapsyrmanyń oryndalmaýy - uiymdastyrý jumysyndaǵy kemshiliktiń kórinisi. Nemese jaýapty tulǵalardyń tikelei qyzmettik mindetterin oryndaýǵa qabiletsizdigi. Bul - ashy syn, biraq halyq syny!» deidi Darhan Myńbai.
Depýtattyń sózine sensek, endi máseleni tez baǵamdap, túbegeili sharalardy iske asyratyn naqty merzimderdi belgileý - Táýelsizdiktiń talaby.
«Árine, bul iske eń bilikti otandyq tarihshylar men basqa da gýmanitarlyq ǵylym ókilderin tartý - mańyzdy is. Sarapshylardyń deńgeii men tájiribesi, talaby men talǵamy joǵary bolýǵa tiis. Túptep kelgende, bul - tarihymyzdyń aldyndaǵy, memleketimizdiń aldyndaǵy jaýapkershilik. Kezek kúttirmes mindet. Bul jańa býyn, jas talaptar úshin aýadai qajet. Óitkeni, otandy súiý memlekettik tildi meńgerýden, tarihty bilýden bastalady» dep túiindedi sózin Májilis depýtaty.
.jpeg)